Իրանը բացահայտել է «Ուկրաինայի միջազգային ավիաուղիներ»-ի սխալմամբ խոցված Boeing 737-800 ինքնաթիռի սև արկղերի որոշ տվյալները: Այս մասին հաղորդում է Associated Press-ը:
Թռիչքային ձայնագրիչներից տեղեկատվության վերականգնման աշխատանքներին մասնակցել են ուկրաինացի և ամերիկացի փորձագետներ, ինչպես նաև Ֆրանսիայի, Կանադայի, Շվեդիայի և Մեծ Բրիտանիայի մասնագետները:
Իրանի քաղաքացիական ավիացիայի կազմակերպության ղեկավար Թուրաջա Դեհքանի Զանգենեն ասել է, որ վերծանված ձայնագրության տևողությունը կազմել է ընդամենը 19 վայրկյան: Նա ենթադրել է, որ ինքնաթիռը խոցած առաջին հրթիռը խափանել է ձայների ձայնագրման համակարգը: Զանգենեն նաև նշել է, որ Թեհրանը ստացված բոլոր տեղեկությունները կներառի աղետի հետաքննության վերաբերյալ ամփոփիչ զեկույցում:
«Ուկրաինայի միջազգային ավիաուղիներ»-ի Boeing 737-800 ինքնաթիռը վթարի է ենթարկվել հունվարի 8-ի առավոտյան՝ Թեհրանի օդանավակայանից դուրս գալուց հետո: Զոհվել է 176 մարդ, այդ թվում՝ Իրանի, Ուկրաինայի, Կանադայի, Մեծ Բրիտանիայի, Գերմանիայի, Շվեդիայի և Աֆղանստանի քաղաքացիներ, ինչպես նաև անձնակազմի ինը անդամը: Իրանը խոստովանել է, որ սխալմամբ խոցել է ինքնաթիռը: