Superjet ռուսական նոր ինքնաթիռները, որոնցից առաջինը հայտնվել էր «Արմավիա» ավիաընկերության ինքնաթիռների պարուկում, արդեն չորս օր է՝ չի շահագործվում: RBC daily թերթին հայտնի է դարձել, որ ինքնաթիռի շարժիչում խնդիրներ են հայտնաբերվել: Սա ռուսական ինքնաթիռի առաջին նման խնդիրն է:
Ինքնաթիռը մինչև հիմա իրականացրել է 234 չվերթ՝ 577 ժամ ընդհանուր տևողությամբ՝ հիմնականում Երևանից Մոսկվա, Լառնակա, Խարկով, Հռոմ: Ապրիլի 21-ից հետո, երբ «Արմավիան» ստացել է ինքնաթիռը, այն գրեթե ամեն օր շահագործվել է: Սակայն հուլիսի 23-ից, երբ ինքնաթիռը վերադարձել է Մարսելից, ինքնաթիռը չի լքել օդանավակայանը:
Նշենք, որ «Արմավիա» ընկերությունն այսօր պաշտոնապես հաստատել է Superjet օդանավի շարժիչի հետ կապված խնդրի առկայությունը: Ինչպես հաղորդում է Մեդիամաքս լրատվական գործակալությունը, «Երևան-Մարսել չվերթի ժամանակ աշխատել է շարժիչի աշխատանքային պարամետրերի շեղման ցուցիչը: Թռիչքային շահագործման գործող ձեռնարկի համաձայն՝ օդանավի անձնակազմը ձեռնարկել է միջոցներ, որոնք հնարավորություն են տվել ավարտել թռիչքը նորմալ ռեժիմով և իրականացնել հետադարձ թռիչք: Շեղման պատճառների վերլուծության համար ստեղծվել է հանձնաժողով, որը կազմված է Սուխոյի քաղաքացիական ինքնաթիռներ (ՍՔԻ), PowerJet եւ Արմավիա ընկերությունների ներկայացուցիչներից»,- ասել են «Արմավիա»-ի մամուլի ծառայությունից:
Հիշեցնենք՝ սա առաջին խնդիր չէ, որ առաջացել է նորաստեղծ այս ինքնաթիռում: «Աերոֆլոտ» ավիաընկերությունը հայտարարել էր օդափոխման համակարգում եղած խնդիրների մասին: Իսկ մի քանի շաբաթ առաջ պարզվել էր, որ հայկական ավիաընկերությանը տրամադրված ինքնաթիռի անիվների հիմքը 75 ուղևորի համար նախատեսված ինքնաթիռների համար է, այնինչ «Արմավիա»-ի ինքնաթիռը 95 ուղևոր է փոխադրում:
