Հայաստանցի ֆուտբոլիստները շարունակում են մնալ արտասահմանյան ավելի բարձր կարգ ունեցող ակումբների ուշադրությունից դուրս։ Մատների վրա կարելի է հաշվել այն տեղացի ֆուտբոլիստներին ովքեր վերջին 2-3 տարիներին տեղափոխվել են եվրոպական ուժեղ ակումբներ։ Հայկական ակումբների հիմնական մասը նախապատվությունը տալիս է լեգեոներներին, իսկ ահա մեր տղաները հայտնվել են խաղից դուրս վիճակում։
Որպեսզի տիրող իրավիճակն ավելի պատկերավեր լինի, հայացք նետենք դեպի հարևան Վրաստան։ Ներկայումս բաց տրանսֆերային պատուհանի ընթացքում վրացի ֆուտբոլիստները շարունակում են տեղափոխվել արտասահմանյան թիմեր։ Ներկայացնենք թերևս ամենաթարմ օրինակները։ Ամառային տրանսֆերային պատուհանի ընթացքում Թբիլիսիի «Դինամոյի» 21-ամյա կիսապաշտպան Նիկոլոզ Նինուան պայմանագիր է կնքել հունական ՊԱՕԿ-ի հետ։ Տրանսֆերի արժեքը կազմել է 850 հազար եվրո։ Գորիի «Դիլայի» 24-ամյա պաշտպան Գուրամ Գիորբելիձեն էլ տեղափոխվել է ավստրիական «Վոլֆսբերգ»։ 2019/2020 թթ տրանսֆերային պատուհանների ընթացքում Բաթումի «Դինամոյի» հարձակվող Ռոման Չանթուրիան հայտնվել էր իտալական «Էմպոլիում», իսկ «Սաբուրթալոյի» կիսապաշտպան Գեորգի Քոչորաշվիլին՝ իսպանական «Լևանտեում»։ Վրացական թիմերից եվրոպական բարձրակարգ թիմեր տեղափոխված ֆուտբոլիստներին կարելի է շարունակ թվարկել։ Իսկ ինչ պատկեր է տիրում Հայաստանում։
Ամառային տրանսֆերային պատուհանի ընթացքում հայաստանցի ֆուտբոլիստներից արտասահմանյան ակումբ է տեղափոխվել միայն «Փյունիկի» պաշտպան Արմեն Մանուչարյանը պայմանագիր կնքելով Վոլգոգրադի «Ռոտորի» հետ։ 2019/2020 թթ թրանսֆերային պատուհանների ընթացքում տեղացի ֆուտբոլիստներից այլ երկրների թիմերում են հայտնվել Էրիկ Վարդանյանը, Պետրոս Ավետիսյանը, Ռումյան Հովսեփյանն ու Արտակ Դաշյանը։ Վերջինս համալրել է Ղազախստանի երկրորդ դիվիզիոնը ներկայացնող «Ատիրաուի» շարքերը։ Ռումյան Հովսեփյանը պայմանագիր կնքելով բուլղարական «Արդայի» հետ մեկ տարի անց վերադարձավ, հայտնվելով «Ալաշկերտում»։ Պետրոս Ավետիսյանը ելույթ է ունենում ղազախական «Տոբոլում», որը մեծ հաշվով չի գերազանցում մեր ֆուտբոլիստի նախկին թիմին՝ «Արարատ-Արմենիային»։
Ինչ վերաբերվում է Էրիկ Վարդանյանին, ապա տեղափոխվելով Ռուսաստանի Պրեմիեր լիգան ներկայացնող «Սոչի», վնասվածքի պատճառով այս թիմի կազմում չի մասնակցել պաշտոնական հանդիպման։ Նկատենք, որ ի տարբերություն վրացիների՝ հայ ֆուտբոլիստները լավագույն դեպքում հայտնվում են մասնավորապես ԵԱՏՄ երկրների թիմերում՝ մասնավորապես Ղազախստանում և Ռուսաստանում։ Ներկայում բաց տրանսֆերային պատուհանի ընթացքում համոզվեցինք սակայն , որ ԵԱՏՄ երկրներում լեգեոներների սահմանափակման վերանալուց հետո՝ նույնիսկ ռուսական և ղազախական թիմերը այնքան էլ հետաքրքրված չեն հայաստանցի ֆուտբոլիստներով։