Ախալքալաքում օգոստոսի 21-ին փորձել են պայթեցնել Վրաստանի խորհրդարանի մեծամասնական պատգամավոր Հենզել Մկոյանի եղբոր` Մարտուն Մկոյանի ավտոմեքենան։ Ուժեղ պայթյունի հետևանքով բացվել են մեքենայի անվտանգության 6 բարձիկները, ինչի շնորհիվ Մարտուն Մկոյանը չի տուժել։
«Առաջին լրատվկան»-ի հետ զրույցում Հենզել Մկոյանը ներկայացրեց տեղի ունեցածն ու դրա նախապատմությունը. «Այս լարվածությունն արդեն 6-7 ամիս գնում է, այդքան ժամանակ իմ նկատմամբ սև PR է իրականացվում, խաղում են իմ վարկանիշի հետ, որ ժողովրդի մեջ այլ բաներ սերմանեն, թե ես այդ մարդը չեմ, բայց ժողովուրդը դա չի ընդունում: Ամեն ինչ սկսվեց այն ժամանակ, երբ անցյալ տարվա հոկտեմբերին, եղբայրս, որի մոտ 300-ից ավելի մարդ է աշխատում, հենց փողոցում, ճանապարհի վրա նրան ծեծեցին: Եղբորս աչքը 5-6 տեղից կարել էին: Դրանից հետո այս տարվա մարտի 26-ին իմ նկատմամբ մահափորձ կատարվեց: Բոլոր տեսանյութերում երևում է, նաև 20-ից ավելի վկաներ ասում են, որ 3 անգամ ինձ վրա կրակել են, բայց դա էլ անուշադրության մատնվեց: Դրանից հետո հուլիսի 20-ին ինձ զանգեցին ֆեյսբուքով, ասացին՝ քեզ խելոք պահի, առաջադրվելու մասին չմտածես, թե չէ ամենաթանկագինը ձեռքիցս կառնեն: 4 օր հետո, հուլիսի 24-ին վայբերով զանգեցին, ասացին, որ մեծ գումար պետք է ուղարկես, թե չէ քեզ կսպանենք: Այդ ամեն ինչից հետո արդեն եղբորս են մի քանի անգամ անհանգստացրել: Այս անգամ էլ երևի գիտեին, որ մեքենայի մեջ է, դրա համար պայթեցրին: Շատ ուժեղ էր պայթյունը, որովհետև այդ ծառի տակ փոս է առաջացել, ջարդվել են ճյուղերը: Պայթյունը ձայնը լսվել է 3 կմ հեռավորությունից, բացի այդ կողքի շենքի բնակարաններում կահույքը տեղից շարժվել է, մահճակալները մի մետր տեղաշարժվել են: Եղբորս բախտը բերել է, որ անվտանգության 6 բարձիկները բացվել են»:
Հենզել Մկոյանը համոզված է, որ սա քաղաքական նպատակ է հետապնդում, որ ինքը չառաջադրվի հաջորդ ընտրություններում. «Այո նպատակը դա է, որովհետև 21 տարի ես եղել եմ ժողովրդի կողքին»:
Նա հավելեց, որ դեպքի առթիվ հարուցվել է քրեական գործ. «Դեռ այն ժամանակ, երբ առաջին անգամ ինձ զանգեր եկան, ես դիմեցի գլխավոր դատախազին, նշեցի, որ ինձ ուզում են սպանել: Նրանք դա ուղարկեցին Ախալցխայի շրջանային քննչական մարմին, որը չէր կարելի, որովհետև ես լինելով խորհրդարանի պատգամավոր, պետք է այդ խնդրին հետամուտ լիներ գլխավոր դատախազությունը, ոչ թե ուղարկեին շրջանային ոստիկանություն կամ քննրական մարմիններ»:
Հարցին, թե ո՞ւմ եք կասկածում, Մկոյանն արձգանքեց. «Ես ամբողջ գիշեր գրել եմ, ձայնագրել եմ իմ տեսաուղերձը, որտեղ նշում եմ, որ ինձ ուզում են սպանել և ես պատրաստվում եմ այդ ուղերձ ուղարկել աշխարհի բոլոր երկրներում հայությանը: Իրենք ոչ թե սպառնում են միայն, այլև իրենց ասածն անում են: Իրենք զանգում են, ասում են՝ սա ենք անելու ու անում են: Ես հիմա չեմ կարող անուններն ասել, բայց ես արդեն պատրաստել են տեսաուղերձը, որտեղ ամեն ինչ ասել եմ, դրա մասին բոլորը կիմանան»: