Այսօր լրագրողների հետ հանդիպման ժամանակ Հայաստանի ստոմատոլոգիական ասոցիացիայի նախագահ Աշոտ Գևորգյանը ներկայացրեց ատամնաբուժության բնագավառում վերջին տարիներին առաջացած խնդիրները՝ նշելով, որ ամբողջ աշխարհում Հայաստանն առաջին տեղն է զբաղեցնում ատամնաբույժների թվով:
«Ամբողջ աշխարհում յուրաքանչյուր հազար մարդու համար նախատեսնած է յոթ ատամնաբույժ, իսկ Հայաստանում՝ տասնյոթ»,- նշեց Ա. Գևորգյանը՝ հավելելով, որ սա չի նշանակում, թե որակն ապահովվում է: Նա նաև տեղեկացրեց, որ վերջին տասը տարիների ընթացքում ատամնաբուժության բնագավառը բուռն զարգացում ապրեց, դարձավ տեխնիկապես լավ հագեցած, որին զուգահեռ բացվեցին բազմաթիվ մասնավոր բժշկական հաստատություններ, որոնք արտադրում են ոչ այնքան որակյալ մասնագետներ:
«Հայաստանում կա միայն յոթ հարյուր արտոնագրված բժշկական հաստատություն, իսկ չարտոնագրված՝ շատ ավելի շատ: Այս հաստատությունների բժիշկները հետագայում բացում են ոչ արտոնագրված ատամնաբուժական կենտրոններ, որոնց մատուցած ծառայություններից օգտվելը բազմաթիվ խնդիրներ կարող է առաջացնել»,- ընդգծեց Հայաստանի ստոմատոլոգների ասոցիացիայի նախագահը:
