Շախմատի Հայաստանի հավաքականը հաղթանակներով մեկնարկեց առցանց Օլիմպիադայում։ Առաջին տուրում մեր Հայաստանի ընտրանին 4:2 առավելության հասավ Ռումինիայի նկատմամբ, իսկ երկրորդ տուրում անսպասելիորեն 2․5։3․5 հաշվով զիջեց Բուլղարիային: Վերջին տուրում մերոնք 4․5-1․5 հաշվով հաղթեցին Թուրքիայի հավաքականին: Այս տարի համաշխարհային Օլիմպիադան անց է կացվում նոր մրցակարգով։ Մասնավորապես փոխվել է օլիմպիադայի ձևաչափը, ինչպես նաև մասնակից հավաքականների քանակը: Թիմերը բաղկացած են 6 հիմնական և 6 պահեստային խաղացողներից: Հիմնական կազմում պետք է լինեն 2 տղամարդ, 2 կին, մինչև 20 տարեկան 1 պատանի և մինչև 20 տարեկան 1 աղջիկ։ Թոփ դիվիզիոնում ընդգրկված են 40 հավաքականներ, որոնք բաժանված են 4 խմբերի։
Խմբում առաջին տեղերը գրավված թիմերը իրավունք կստանան հանդես գալու 1/4 եզրափակչում, իսկ 2-րդ և 3-րդ հորիզոնականները զբաղեցրած թիմերը կանցկացնեն լրացուցիչ մրցախաղ քառորդ եզրափակչի ուղեգիր նվաճելու համար։ Ըստ վիճակահանության՝ Հայաստանի հավաքականը հանդես կգա С խմբում, որտեղ նրա մրցակիցներն են Ռուսաստանի, Անգլիայի, Բուլղարիայի, Ռումինիայի, Մորոկկոյի, Ալժիրի, Եգիպտոսի, Խորվաթիայի և Թուրքիայի թիմերը։ Այս պահին Հայաստանի հավաքականը 4 միավորով 4-րդն է ենթախմբում։ Առաջին հորիզոնականում է Ռուսաստանի հավաքականը, որն ունի 6 միավոր։ 2-3-րդ հորիզոնականներում են համապատասխանաբար Խորվաթիայի և Եգիպտոսի ընտրանիները, որոնք ունեն 4-ական միավոր, սակայն լրացուցիչ ցուցանիշներով գերազանցում են Հայաստանի հավաքականին։ 4-ական միավոր են վաստակել նաև Անգլիայի և Բուլղարիայի հավաքականները, որոնք գտնում են 5-6-րդ հորիզոնականներում։ 2-ական միավոր ունեն Ռումինիան և Մարոկկոն, իսկ Թուրքիայի և Ալժիրի հյավաքականներին չի հաջողվել միավոր վաստակել։ Ենթախմբում ֆավորիտ է համարվում Ռուսաստանի հավաքականը, որն ունի բավական ուժեղ և բալանսավորված կազմ։ Երեկ Ռուսաստանի հավաքականը 4․5-1․5 հաշվով Բուլղարիային հաղթելուց հետո, երկրորդ տուրում 5․5-0․5 հաշվով առավելության էր հասել Թուրքիայի նկատմամբ։
Երրորդ խաղում ռուսները 3․5-2․5 հաշվով պարտության են մատել խորվաթներին։ Այո, երեկ Թուրքիայի նկատմամբ տարած հաղթանակը մեծ ոգևորություն է առաջացրել, բայց չմոռանանք, որ մեզ սպասում է նաև խիստ կարևոր մրցավեճ Ռուսաստանի հետ։Հայաստանի հավաքականի համար ուժեղ մրցակիցներ կարելի է համարել նաև Անգլիայի և Խորվաթիայի հավաքականներին։ Մեր նպատակը ենթախմբում 1-3-րդ հորիզոնականներում հայտնվել է, որը հնարավորություն կտա պայքարը շարունակել քառորդ եզրափակչում։ Բուլղարիայից կրած պարտությունը որոշակիորեն բարդացրել է խնդիրը։ Այսօր կկայանան 4-6-րդ տուրերը: Մեր հավաքականի մրցակիցներն են լինելու Խորվաթիայի, Ալժիրի և Մարոկկոյի թիմերը: 6 միավոր վաստակելու պարագայում Հայաստանի հավաքականը լուրջ քայլ կկատարի դեպի փլեյ-օֆ։
Համաշխարհային օլիմպիադայի այս ձևաչափը լավ առիթ է կարծիք կազմելու հայկական շախմատի, ըստ էության, բոլոր շերտերում տիրող վիճակի մասին։ Մասնավորապես Հայաստանի ներկայիս հավաքականում ներառված են տարիքային գրեթե բոլոր խմբերի առաջատարները։ Այո, Հայաստանի տղամարդկանց հավաքականը ուժեղագույններից է աշխարհում, իսկ ահա մյուս հավաքականները վերջին տարիներին աչքի չեն ընկել փայլուն արդյունքներով։ Ընթացիկ օլիմպիադայում Հայաստանի տղամարդկանց թիմում ընդգրկված են Լևոն Արոնյանը, Գաբրիել Սարգսյանը, պահեստայիններն են Հրանտ Մելքումյանը, Սամվել Տեր-Սահակյանը: Մարզիչն է Արշակ Պետրոսյանը:Կանանց թիմում են Էլինա Դանիելյանը և Լիլիթ Մկրտչյանը: Պահեստայիններ՝ Մարիա Գևորգյան, Սուսաննա Գաբոյան: Մարզիչ՝ Զավեն Անդրիասյան:Մինչև 20 տարեկանների թիմում խաղում են Հայկ Մարտիրոսյանն ու Աննա Սարգսյանը: Պահեստայիններ՝ Շանթ Սարգսյան, Մարիամ Ավետիսյան: Մարզիչ՝ Արտաշես Մինասյան:
