«Առաջին լրատվական»-ը զրուցել է ԱԺ անկախ պատգամավոր Արման Բաբաջանյանի հետ:
– Դուք և Հայ ազգային կոնգրեսի իրավական հարցերի պատասխանատու Արմեն Խաչատրյանը սկսել եք գործընթաց, որի շրջանակներում ուսումնասիրում եք գործող դատավորների՝ նախկինում կայացրած դատական վճիռները, չեք բացառել, որ դրանց արդյունքում կարող են նաև իրավական գործընթացներ հարուցվել։ Ինչի՞ մասին է խոսքը, ո՞րն է ձեր նախաձեռնության նպատակը։
– Մեր նախաձեռնած գործընթացն այլ կերպ կարելի է անվանել հետաքննություն կամ ուսումնասիրություն, որի նպատակն է պարզել, թե ինչպես է իշխանության դատական թևը իշխանության մյուս թևերի՝ գործադիրի և օրենսդիրի հետ նպաստել սահմանադրական կարգի տապալմանը, որի արդյունքում 2008 թվականին Սերժ Սարգսյանը դարձել է ՀՀ նախագահ։ Այսինքն՝ գործընթացի հիմքը, ելակետը սահմանադրական կարգի տապալումն է, որը եղել է համակարգված, կազմակերպված գործողություն, և որին մաս են կազմել իշխանության բոլոր երեք թևերը, իհարկե՝ գործադիր իշխանության դոմինանտ դերակատարմամբ։ Այդուհանդերձ, դատական համակարգը ևս զգալի մասնակցություն ու դերակատարություն է ունեցել սահմանադրական կարգի տապալմանը և իր գործողություններով նպաստել, օժանդակել է այդ հանցագործության իրականացմանը։ Դա առավելապես դրսևորվել է 2008 թվականի Մարտի 1-ի գործերով, որոնց մասնակցել են շուրջ հինգ տասնյակ դատավորներ։ Բայց մեր ուսումնասիրության խնդիրը սոսկ դատական ակտերը չեն, այլ դրանց ստեղծման, ծննդի ողջ գործընթացը՝ սկսած մեղադրական եզրակացություններից ու դատախազական գործողություններից մինչև վերջնական դատական ակտեր։ Եվ ահա այդ հարթությունում մենք արդեն իսկ մոտ ենք այն եզրահանգմանը, որ դատաիրավական համակարգի տասնյակ ներկայացուցիչներ՝ սկսած դատախազներից ու քննիչներից մինչև դատավորներ, մասնակից են եղել ակնհայտ ապօրինի դատական վճիռների կայացմանը, որոնց արդյունքում տասնյակ մարդիկ զրկվել են ազատությունից, հետապնդվել ու բռնաճնշումների են ենթարկվել։ Եվ խնդիրն այն է, որ այդ գործերով վճիռներ կայացրած հանցավոր դատավորների մի մեծ մասը այսօր էլ շարունակում է պաշտոնավարել՝ անգամ չթաքցնելով իրենց կապերը նախկին իշխանությունների, օլիգարխների հետ։ Եվ մեր նախաձեռնած գործընթացի վերջնանպատակն է դատական համակարգը մաքրել այդպիսի դատավորներից, փաստերի ճնշման տակ հասնել նրանց հեռացմանը համակարգից։
– Այսինքն՝ ստացվում է, որ ձեր նախաձեռնության նպատակը դատավորների զտումն է կամ վեթի՞նգը։
– Լայն իմաստով՝ այո։ Ինչպես հայտնի է, ես իմ համախոհների հետ դեռ ամիսներ առաջ հիմնադրել ենք Վեթինգի դիմադրական շարժում, որի նպատակն է գործող իրավակարգավորումների ու կառուցակարգերի շրջանակներում վեթինգի իրականացումը։ Հասկանալի է, որ վերը նշված գործընթացը չի կարող հանգեցնել համատարած վեթինգի, այդուհանդերձ, եթե մենք հաջողություն արձանագրենք, ապա կարող ենք հասնել առնվազն մի քանի դատավորների զտմանը, ինչն արդեն ես կհամարեմ ձեռքբերում։
