Պավլիկ Մանուկյանը տենց լուրերից վատացող չի։ Այս մասին «Առաջին լրատվական»-ի հետ զրույցում նշեց «Սասնա ծռեր» զինված խմբի անդամ Պավլիկ Մանուկյանը, անդրադառնալով տարածված լուրերին, թե այն բանից հետո, երբ դատարանում մեղադրող կողմը առաջարկել է իրեն դատապարտել 9 տարվա ազատազրկման, Պավլիկ Մանուկյանը վատացել է և նրան տեղափոխել են վերակենդանացման բաժանմունք։
Պավլիկ Մանուկյանը տեղեկացրեց, որ բոլորին հայտնի է, որ ոտքի հետ կապված խնդիր է ունեցել, որը վիրահատել են. «Ոտքիս վիրահատությունը տևել է 7,5 ժամ, շատ բարդ վիրահատություն էր, որի հետևանքով մյուս օրգանների վրա ազդեցություն է ունեցել։ Հիմա սրտի հետ կապված խնդիրներ ունեմ, դրա համար տեղափոխել են վերակենդանացման բաժանմունք»,-ասաց նա՝ կատակով հավելելով. «ՊՊԾ գնդի հետևանքներ եմ վայելում»։
Հարցին, թե իր համար անակնկա՞լ էր 9 տարվա ազատազրկում պահանջելը, Պավլիկ Մանուկյանը բացասական պատասխան տվեց. «Ոչ, անակնկալ չէր, քանի որ ոչ մի բան էս երկրում չի փոխվել։ Պավլիկ Մանուկյանը ոչնչից վախեցող չի»։
Հիշեցնենք, որ նախորդ դատական նիստին գործով մեղադրող դատախազները հանդես եկան մեղադրական ճառով։
Մեղադրող կողմը դատարանին միջնորդեց Արայիկի Խանդոյանի նկատմամբ քրեական հետապնդումը դադարեցնել՝ նրա մահվան հիմքով, Արեգ Կյուրեղյանին, էդվարդ Գրիգորյանին պատիժ սահմանել՝ 8 տարի 6 ամիս, Գագիկ Եղիազարյանին՝ 8 տարի 9 ամիս, Սեդրակ Նազարյանին 9 տարի, Մխիթար Ավետիսյանին 8 տարի, 9 ամիս, Վարուժան Ավետսիյանին 8 տարի 9 ամիս, Պավել Մանուկյանին 9 տարի, Արմեն Բիլյանին 21 տարի ժամկետով, Սմբատ Բասեղյանին՝ ցմահ ազատազրկում։
