Վերջերս ավելի շատ է քննարկվում այն հարցը, թե արդյոք ԱՄՆ ներկայիս նախագահի կինը՝ Միշել Օբաման, պատրաստվո՞ւմ է զբաղվել քաղաքականությամբ Բարաք Օբամայի նախագահությունից հետո: «Իմ պատասխանն այսպիսին է՝ ոչ, և վերջ»,- ասել է Միշելը Ջիլ Բայդենի՝ ԱՄՆ փոխնախագահ Ջո Բայդենի կնոջ հետ համատեղ հարցազրույցի ժամանակ, որ նրանք տվել են AARP The Magazine ամսագրին: «Ես մտածում եմ՝ պատճառներից մեկը, որ ես և Ջիլը մեզ լավ ենք զգում, հետևյալն է՝ մենք զբաղվում ենք այն գործով, որը մեզ հետաքրքիր է»:
Քաղաքագետները կարծիք էին արտահայտել, որ Միշել Օբաման, Հիլարի Քլինթոնի օրինակով, նույնպես կարող է սկսել քաղաքական կարիերա այն բանից հետո, երբ ամուսինը լքի նախագահի պաշտոնը: Ոմանք կարծում են, որ Միշել Օբաման մի քանի տարի հետո կարող է ընտրվել նահանգապետ Իլլինոյս նահանգում՝ այսպիսով զբաղեցնելով մինչև նախագահ ընտրվելը ամուսնու տեղը Կոնգրեսում:
«Տարիքի հետ ես հասկացել եմ, որ պետք է որոշես, թե քեզ ինչ է պետք կյանքում: Իսկ լինել քաղաքական գործիչ… Ես երբեք չեմ ցանկացել լինել քաղաքական գործիչ»,- ասել է Միշելը։ Բայդենի կինը նույնպես չի ցանկանում զբաղվել քաղաքականությամբ: «Դա երբեք չի եղել իմ ցանկությունը: Ես երբեք չեմ ցանկացել մասնակցել նախընտրական գործընթացներին»,- ասել է Ջիլ Բայդենը:
