«Առաջին լրատվական»-ի զրուցակիցն է Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանը։
– Տիկին Վարդանյան, ԱՄՆ նախագահական ընտրություններին մոտ 2.5 ամիս ժամանակ է մնացել, ի՞նչ դիրքորոշում ունի հայ համայնքը։
– Ես կարծում եմ, որ դեռ վաղ է ասել, թե ինչ արդյունք կարող է լինել։ Ինչպես Հայաստանում, այնպես էլ ԱՄՆ-ում ամեն ինչ կարող է վերջին վայրկյանին փոխվել։ Դուք հարցնում եք՝ հայերն ո՞ւմ կպաշտպանեն։ Այստեղ շատ կարևոր է ասել, որ հայերը միասնական ձայն չեն տալու մեկ հոգու։ Կան հայեր, որոնք հանրապետական են, կան նաև դեմոկրատներ, կան նաև անկախ հայեր ու բազմաթիվ հարցերի շուրջ վերլուծություն անելով՝ ձայն կտան։ Կարող է որոշել՝ Թրամփին, կարող է նաև Բայդենին։ Կարող է առաջնորդվեն առողջապահության ու մարդու իրավունքների հարցերով ու, ըստ այդմ, որոշում կայացնեն։ Այս տարի շատ հետաքրքիր ընտրություններ են լինելու։
– Դեմոկրատ թեկնածու Ջո Բայդենի փոխնախագահի պաշտոնում առաջադրել է Քամալա Հարիսին։ Այս որոշման շուրջ ի՞նչ կասեք։
– Ես անձնական կարծիք չեմ հայտնելու նրա մասին՝ ո՛չ դրական, ո՛չ բացասական։ Սա ոչ այն պատճառով, որ նրան հավանում եմ կամ չեմ հավանում, պարզապես մեր կազմակերպությունը չի մասնակցում, կարծիք չի հայտնում ընտրությունների կամ թեկնածուների մասին։
– Բայց նա իր հայամետ գործունեությամբ աչքի ընկե՞լ է։
– Այո, դրական բաներ արել է, համայնքի հետ շատ լավ հարաբերություններ է ունեցել՝ ինչպես և Բայդենը։ Ուստի այս իմաստով կարծում եմ՝ պետք է որ խնդիրներ չլինեն հայերի համար։ Հետաքրքիր է լինելու։ Հիմա, երբ հայտարարվել է, որ հենց նա է փոխնախագահը լինելու՝ դա շատ ակտիվություն կարող է մտցնել նաև համայնքում։
– Թրամփի վերընտրվելու դեպքում ի՞նչ սպասել հայկական հարցերի հետ կապված, նորից նույն «սառը վերաբերմո՞ւնքը»։
– Հուսով եմ՝ ոչ, բայց, ցավոք սրտի, առայժմ չեմ տեսել այնպիսի մի բան, որ կարող է ինձ հույս տալ, որ դա կփոխվի։ Ես երկար տարիներ ասում էի, որ Հայոց ցեղասպանության հետ կապված բանաձևը Ներկայացուցիչների պալատում ու Սենատում ընդունվելու է, ինձ վրա ծիծաղում էին, բայց ես վստահ էի։ Անցյալ տարի, եթե հիշում եք՝ եղավ։ Ես հույս ունեմ, որ Թրամփի վերաբերմունքն էլ կփոխվի։ Նա կհասկանա, որ Թուրքիան՝ Էրդողանը, Ալիևը իր ընկերները չեն, ու այդպիսով հենց ԱՄՆ-ի պատմությունը հերքելով իրեն պատիվ չի բերում։
– Իսկ Բայդենի ընտրվելու դեպքում ի՞նչ ակնկալիքներ կան։
– Ով էլ ընտրվի՝ առաջին հերթին պետք է հետևի ԱՄՆ ժողովրդի պահանջներին։ Պետք է տեսնեն՝ ինչպես բարելավել վիճակը, որովհետև սարսափելի ծանր վիճակ է։ Միևնույն ժամանակ պետք է նայել նաև արտաքին քաղաքականությանը։ Ես կարծում եմ, որ հայերի նկատմամբ դրական քայլեր կլինեն։ Վստահ եմ, որ Հայաստանի նկատմամբ ավելի շատ ուշադրություն կդարձվի, կարող է Հայոց ցեղասպանությունն էլ ճանաչվի, Արցախին ավելի մեծ ուշադրություն է հնարավոր՝ թե՛ առանձին ԱՄՆ-ի և թե՛ Մինսկի խմբի համանախագահության շրջանակներում։ Ադրբեջանին պետք է պատժել այն ամենի համար, ինչ նա անում է Հայաստանի ու Արցախի նկատմամբ։
