Երկօրյա ճգնաժամը, որ պայմանավորված է Կոսովոյի հատուկ ջոկատի կողմից սերբերի վերահսկած անցագրային կետի գրավմամբ, ի վերջո հանգեցրել է բռնությունների: Ավելի քան 10 մարդ (ենթադրաբար՝ սերբեր) դիմակներով և մուգ ակնոցներով «մոլոտովի կոկտեյլներ» են նետել անցագրային կետերից մեկի վրա, որի նկատմամբ երկու օր առաջ վերահսկողություն էին սահմանել Կոսովոյի հատուկջոկատայինները:
Այրվող նյութեր են նետվել նաև խաղաղապահ առաքելություն իրականացնող միջազգային ուժերի ուղղությամբ: Հաղորդվում է, որ երեկ սպանվել է մեկ սերբ:
Սերբիայի նախագահ Բորիս Տաջիչը կողմերին հանգստության կոչեր է արել, ինչպես նաև պահանջել է ՄԱԿ-ի Անվտանգության խորհրդի արտահերթ նիստ: Գերմանիան, որ այժմ նախագահում է Անվտանգության խորհրդում, հայտարարել է, որ ՄԱԿ-ում անցկացվում են փակ խորհրդակցություններ՝ խնդրին լուծումներ գտնելու համար: Կոսովոյի իշխանություններն իրավիճակի սրման մեջ մեղադրում են Սերբիայի իշխանություններին:
Հիշեցնենք, որ Կոսովոյի անկախանալուց հետո այդ պետությունում մնացին մոտ 60 հազար էթնիկ սերբեր, որոնք խիտ բնակվում են Կոսովոյի հյուսիսում: Այստեղ նրանք վերահսկում էին անցագրային կետերը, որոնք կապում են Սերբիան և սերբաբնակ կոսովյան տարածքները: Սակայն երկու օր առաջ Կոսովոյի ալբանական իշխանությունները ցանկացել են սեփական վերահսկողությունը հաստատել այդ անցագրային կետերում, ինչից հետո բռնությունները են սկսվել:
