Վիճակագրության տվյալների համաձայն՝ Հայաստանում կորոնավիրուսի հաստատված դեպքերի թվի կայուն նվազում է նկատվում: Կառավարության որոշմամբ՝ երկարաձգվեց արտակարգ դրության ռեժիմը՝ որոշ սահմանափակումներ մեղմացնելով: Կարո՞ղ ենք արդյոք համարել, որ մոտենում ենք բնականոն կյանքին: Այս և այլ հարցերի շուրջ «Առաջին լրատվական»-ի հետ քննարկմանը մասնակցեցին «Հանուն հանրապետության» նախաձեռնության անդամ Հայկ Այվազյանը, «Քաղաքացու որոշում» կուսակցության գործադիր մարմնի անդամ Արտակ Կիրակոսյանը և վերլուծաբան Արեգ Քոչինյանը:
«Մտել ենք կորոնավիրուսի կայուն հաղթահարման փուլ, միևնույն ժամանակ չի կարելի մոռանալ երկրորդ հավանական ալիքի մասին, ոչ միայն Հայաստանում, այլ նաև ամբողջ աշխարհում դա լրջագույն սպառնալիք է համարվում»,- նշեց Արեգ Քոչինյանը՝ հավելելով, որ կորոնավիրուսի հաղթահարումից հետո մուտք ենք գործելու համավարակի տնտեսական հետևանքների վերացման փուլ:
Արտակ Կիրակոսյանի դիտարկմամբ՝ դեռ երկար ժամանակ կմնանք կորոնավիրուսի պատանդը. «Կորոնավիրուսը փոխել է հանրային հարաբերությունները, նախկին վիճակին վերադարձը շատ դժվար է լինելու: Տնտեսական առումով նույնպես չենք տեսել հակաճգնաժամային իրական փոփոխություններ, օգնություն է ցուցաբերլվել ինչ-որ խավերի, բայց հստակ չէ, թե որ ոլորտում պետք է «գոտիները ձգել», որում՝ ներդրումներ անել: Մինչև տնտեսության ոլորտում ընկալումների վերադասավորում չլինի, դժվար կլինի դուրս գալ այս վիճակից»:
Հայկ Այվազյանի խոսքով՝ կորոնավիրուսը դեռ երկար ժամանակ կմնա, բայց կառավարությունը պետք է կորոնավիրուսի թեմայից անցնի այլ թեմաների քննարկմանը, մասնավորապես անդրադառնա տնտեսության խնդիրներին:
Արեգ Քոչինյանը հավելեց, որ իշխանությունն արդեն պետք է կենտրոնանա պոզիտիվ օրակարգ ձևավորելու վրա և օր առաջ բարեփոխումներ իրականացնի՝ հաշվի չառնելով ոչ մի խոչընդոտ:
Արտակ Կիրակոսյանի դիտարկմամբ՝ հասարակական ընկալումների մեջ էական բեկում է եղել՝ կապված երկու իրադարձության հետ՝ Ամուլսարի դեպքերի և Լուկաշենկոյին շնորհավորելու հետ. «Փաշինյանի քաղաքական իմիջը ճաք տվեց»:
«Լուկաշենկոյին երևի թե հնարավոր չէր շնորհավորել, քանի որ հետագայում համագործակցության խնդիր կա, բայց Փաշինյանը շտապեց շնորհավորել Լուկաշենկոյին, շուտ շնորհավորողների անփառունակ ցանկի անդամ պետք չէր դառնալ»,- նշեց Հայկ Այվազյանը
Մանրամասն՝ տեսանյութում: