Հայաստանում ԱՄՆ դեսպանությունն արգելում է օգտվել հայկական ավիափոխադրողներից պաշտոնական ուղևորություններ կատարելու համար: Այս մասին տեղեկանում ենք դեսպանատան տարածած հաղորդագրությունից, որում ասվում է. «2020 թվականի հունիսին Եվրամիությունը (ԵՄ) բոլոր հայ ավիափոխադրողներին ավելացրեց ԵՄ օդային անվտանգության «սև» ցուցակի մեջ՝ կապված Հայաստանում հավաստագրված ավիափոխադրողների անվտանգության վերահսկողության վերաբերյալ մտահոգությունների հետ: Սահմանափակումը մինչև 2022 թվականն արգելում է բոլոր հայկական ավիափոխադրողներին թռչել ԵՄ երկրներ: Հաշվի առնելով այս հանգամանքը՝ ԱՄՆ դեսպանության աշխատակազմին արգելվում է օգտվել հայկական ավիափոխադրողներից պաշտոնական ուղևորություններ կատարելու համար: Սա ներառում է ստորև բերված սուբյեկտները, բայց չի սահմանափակվում դրանցով ՝ Aircompany Armenia, Armenia Airways, Հայկական ուղղաթիռներ, Atlantis Armenian Airlines, Atlantis European Airways, Mars Avia և Skyball»:
Միջազգայնագետ Սուրեն Սարգսյանն «Առաջին լրատվական»-ի հետ զրույցում անդրադառնալով ԱՄՆ դեսպանատան հաղորդագրությանը, որը ուղղված է նաև ԱՄՆ քաղաքացիներին և ոչ միայն ՀՀ-ում ԱՄՆ դեսպանատան աշխատակիցներին, նկատեց, որ Միացյալ Նահանգներն առաջին երկիրը չէ, որ նման կոչով դիմել է իր քաղաքացիներին։ Իսրայելը ևս հետևել է Եվրոպական միության օրինակին, և Հայաստանում գրանցված որևէ ավիաընկերություն չի կարող թռչել դեպի Իսրայել:
«ԱՄՆ դեսպանատան հաղորդագրությունը պայմանավորված է զուտ անվտանգության գործոնով, քանի որ Եվրոպական միությունը ՀՀ-ում գրանցված բոլոր ավիաընկերությունները սև ցուցակ է մտցրել։ Տրամաբանական է, որ դրան հետևելու էին նման հայտարարություններ, ինչպիսիք արդեն արել են Միացյալ Նահանգները, Իսրայելը։ Ես չեմ բացառում, որ առաջիկայում այլ պետություններ ևս հետևեն Եվրոպական միության օրինակին։ Սա լուրջ հարված է և՛ ավիացիոն ոլորտին, և՛ տուրիզմին։ Նման հայտարարությունները նշանակում են հայկական ավիացիայի վախճանի սկիզբ»,- ասաց Սարգսյանը՝ հավելելով, որ թե՛ ԱՄՆ պաշտոնյաները, թե՛ ԱՄՆ քաղաքացիները կարդում են այս հայտարարությունները, և բնական է, որ դա լուրջ հարված պետք է հասցներ ՀՀ ավիացիայի հեղինակությանը։
Մեր դիտարկմանը՝ 2022 թվականին ԵՄ-ի կողմից սև ցուցակից հանվելուց հետո Հայաստանին կհաջողվի՞ արագ վերականգնվել ոլորտում ու վարկանիշ ձեռք բերել, Սարգսյանը պատասխանեց, որ սահմանափակումները մինչև 2022 թվականն են, բայց դրանից հետո էլ պետք է ևս մեկ անգամ մոնիտորինգ իրականացվի, ու դրական գնահատական ստանալուց հետո նոր միայն Հայաստանը կարող է քայլեր իրականացնել հեղինակության բարձրացման ուղղությամբ: «Բայց դա շատ բարդ, չափազանց բարդ պրոցես է լինելու ցանկացած ավիաընկերության համար»,- ասաց Սարգսյանը։