«Բելառուսում իրավիճակն իրոք շատ մտահոգիչ է և այն, որ բռնություն է կիրառվում՝ անթույլատրելի է: Սակայն, կարծում եմ, որ այդ իրադարձությունները չպետք է կապենք վարչապետի շնորհավորանքի հետ, որովհետև միջպետական հարաբերություններում գոյություն ունեն խաղի որոշակի կանոններ և այս իմաստով՝ վարչապետի շնորհավորանքը պետք է դիտարկել զուտ այդ համատեքստում: Այսպիսի բազմաթիվ դեպքեր կան, որ մի երկրի ղեկավարը շնորհավորում է մեկ այլ երկրի ղեկավարի՝ առանց խորանալու, թե ինչ դեպքեր են այնտեղ տեղի ունենում, որովհետև այլ պետության ներքին գործերին խառնվելը ընդունված չէ: Այսինքն՝ սա զուտ դիվանագիտական էթիկետ է: Այո՛, ես հասկանում եմ այն քննադատությունները, որոնք հիմա հնչում են, սակայն վարչապետն իր գործողություններում պետք է ելնի Հայաստանի Հանրապետության շահերից և անի այն քայլերը, որոնք բխում են ՀՀ շահերից»,- «Առաջին լրատվական»-ի հետ զրույցում նման կարծիք հայտնեց Ազգային Ժողովի «Իմ քայլը» խմբակցության պատգամավոր Միքայել Զոլյանը՝ անդրադառնալով Բելառուսի նախագահական ընտրություններում Ալեքսանդր Լուկաշենկոյի վերընտրվելու կապակցությամբ ՀՀ վարչապետ Նիկոլ Փաշինյանի շնորհավորանքի շուրջ հնչած քննադատություններին՝ այն իրադարձությունների ֆոնի վրա, որոնք այս օրերին տեղի են ունենում Բելառուսում:
Պատգամավորը համաձայն չէ այն կարծիքների հետ, որ Նիկոլ Փաշինյանը Լուկաշենկոյին ուղղված իր շնորհավորանքով ողջունել է այն ամենը, ինչ տեղի է ունենում Բելառուսում: Զոլյանի խոսքերով՝ Փաշինյանը ընդամենը կատարել է այն քայլը, որն անում են բոլոր պետությունների ղեկավարները:
«Նույն բանն արել է նաև նախագահ Արմեն Սարգսյանը, ընդ որում, եթե Փաշինյանը միայն գրավոր շնորհավորանք է ուղարկել, ապա նախագահ Սարգսյանը նաև զանգել և խոսել է Լուկաշենկոյի հետ, և ըստ իս՝ լավ է արել, որովհետև դա նրա պաշտոնից բխող գործառույթ է»,- նկատեց մեր զրուցակիցը:
Մանրամասները՝ տեսանյութում: