Ամուլսարի թեման հանրության ուշադրության տիրույթում է։ Մարդիկ 2 տարուց ավելի պայքարում են առողջ միջավայրի համար։
Վերակառուցման և զարգացման եվրոպական բանկը (ՎԶԵԲ) հայտարարություն է տարածել և ասել, որ դադարեցնում է ներդրումը Ամուլսարի ծրագրում։ Ի՞նչ է սա նշանակում․ «Առաջին լրատվական»-ի հարցին բնապահպան Թեհմինե Ենոքյանը պատասխանեց․ «Առհասարակ, ՎԶԵԲ-ն իր ֆինանսավորումը դադարեցրել է դեռևս 2019 թվականի դեկտեմբերին։ Տեղացի 23 բնակիչներ դիմում-բողոք էին ուղարկել ՎԶԵԲ-ի օմբուդսմենի գրասենյակ և այժմ ստացել են պատասխանը, որում նշվում է, որ ՎԶԵԲ-ն այլևս այդ ֆինանսական օգնությունը չի տրամադրելու «Լիդիանին» և ֆինանսական հետաքրքրություններ այդ ծրագրում չունի։ Այսպիսին է եղել ձևակերպումը։ Այլ ձևակերպումներ չկան, թե որոնք են եղել պատճառները։ Առհասարակ, այս ամենին մենք կարող էինք 6 ամիս առաջ տեղեկանալ, սակայն ստացվում է, որ եթե տեղացիներն այդ բողոք-դիմումը չուղարկեին ՎԶԵԲ-ի օմբուդսմենի գրասենյակ, ապա մենք չէինք էլ իմանալու, որ էսպիսի բան է տեղի ունեցել, կամ իմանալու էինք՝ ավելի ուշ։ Ամեն դեպքում, այս դիմում-բողոքի քննարկմանը տրված է 60 օր, և մենք պետք է անենք ամեն ինչ, որ բոլոր այն կետերը, որոնք խախտվել են՝ ժողովրդավարության ստանդարտը, էկոլոգիական ստանդարտները, կոռուպցիոն ռիսկերը՝ քննարկվեն»։
Իսկ Հայկական բնապահպանական ճակատի անդամ Արփինե Գալֆայանն էլ ասաց․ «Մի քիչ պրոցեդուալ խնդիր է ՎԶԵԲ-ի մասնակցության դադարեցումը, որովհետև «Լիդիան Ինթերնեյշնլը», հիմա կարելի է ասել, որ գոյություն չունի։ Հիմա Նյու Ջերսիի դատարանում «Լիդիան Ինթերնեյշնլի» պարտատերերը վիճարկում են իրենց ներդրումները հետ ստանալու հարցերը, և «Լիդիան Ինթերնեյշնլը» չունի որևէ գույք կամ իր տնօրինության այլ միջոցներ, իսկ ՎԶԵԲ-ն ի սկզբանե մասնաբաժին ուներ հենց «Լիդիան Ինթերնեյշնլում»։ Այսպիսով՝ «Լիդիան Ինթերնեյշնլի» գոյություն չունենալով կարելի է ասել, որ ՎԶԵԲ-ն ավտոմատ կերպով դուրս է գալիս Ամուլսարի ծրագրից։ Պետք է նշեմ, որ մինչ այժմ ՎԶԵԲ-ի մասնակցությունը Ամուլսարի ծրագրին «Լիդիան Ինթերնեյշնլի» համար եղել է քաղաքական հենարան։ Այն ընկերությունները, որոնք ժամանակին ներդրում են արել Ամուլսարի ծրագրում, առաջնորդվել են նրանով, որ ՎԶԵԲ-ն այստեղ կա»։
Մանրամասները՝ տեսանյութում։