«Սասնա ծռեր»-ի գործով դատավարությունը մոտենում է ավարտին, հրապարակվել է մեղադրական ճառը, դատախազն արդեն պատժաչափեր է առաջարկել, ինչն էլ թեժ քննարկումների առիթ է դարձել: Զինված խմբի մի քանի անդամների փաստաբանը տեղի ունեցածը որակել է որպես քաղաքական հետապնդում:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ պատգամավոր Տիգրան Ուրիխանյանը, Գերագույն խորհրդի նախկին պատգամավոր Ազատ Արշակյանը, հրապարակախոս, գրող Սարգիս Հովսեփյանը:
Ազատ Արշակյանի դիտարկմամբ՝ «Սասնա ծռեր»-ի գործը մաքուր և հասարակ քրեական գործ չէ և մաքուր ու հասարակ քաղաքական գործ չէ, սա հիբրիդային գործ է: «Մեր արդարադատությունը, որպես իշխանության մի թև, պետք է կարողանա արդարացի որոշում կայացնել, որը ոչ միայն օրենքով պետք է լինի, այլ նաև հասարակության համար ընդունելի: Եթե զուտ օրենքի տառին հետևեն, հնարավոր է, որ հասարակության համար ընդունելի վճիռ չկայացվի: Քաղաքական վճիռ պետք է կայացվի՝ «Սասնա ծռեր»-ին ընդունում են որպես քաղաքական գործընկեր, թե ոչ:
«Սասնա ծռեր»-ը մեզ կանգնեցրել են փաստի առաջ. մենք ընդունո՞ւմ ենք, որ ՀՀ-ն պետություն չէ, մենք պետք է ընդունենք, որ ճորտ ու ստրուկ ենք եղել: «Սասնա ծռեր»-ն իրենց գործն արդարացնելու համար իջեցնում են ՀՀ քաղաքացիների կարգավիճակը»:
Տիգրան Ուրիխանյանը նույնպես կարծիք հայտնեց, որ «Սասնա ծռեր»-ի գործում քաղաքական բաղադրիչ կա. «Համաձայն եմ, որ դատական ակտը կայացնելիս չպետք է միայն օրենքի տառին հետևելով որոշումներ կայացնել, դատավորների նկատմամբ պահանջը միան օրենքի տառին համապատասխան գործելը չէ, այլ նաև սեփական խղճին ապավինելով և այլ հանգամանքներ ևս հաշվի առնելով: Գործերը պետք է քննվեն ոչ միայն փաստացի, այլ նաև ըստ էության: Ինչպիսի որոշում էլ կայացնի դատարանը, կարծիքների բախում է լինելու»:
Պատգամավորը հավաստիացրեց, որ դատարանի վրա քաղաքական մեծամասնության կողմից ճնշումները և միջամտությունը արդարադատության վրա բացառվում են: Տիգրան Ուրիխանյանը նաև հավելեց, որ իրենք սերունդներին քարոզում են, որ բաց ձեռքերով պայքարը անշեղորեն դեպի հաղթանակի տանող միակ ճանապարհն է:
Սարգիս Հովսեփյանի խոսքով՝ որևէ մեկը բավարարաված չի լինելու «Սասնա ծռեր»-ի գործով ցանկացած վճիռ կայացնելու դեպում.« Հայաստանի պետության դիրքերը թուլացնում է այն փաստը, որ արդարադատության համակարգում վեթինգ տեղի չի ունեցել և դեռ դատական համակարգի նկատմամբ անվստահություն կա:
Նախկին իշխանության գործունեությանը պետք է գնահատական տրվի: Եթե երկիրը ուզուրպացված էր, ապա «Սասնա ծռեր»-ի արարքը այլ կերպ պետք է դիտարկվի: Իշխանությունը իրեն ծանր դրության մեջ է դրել, մի կողմից՝ «Սասնա ծռեր»-ին ահաբեկիչ չի համարում, մյուս կողմից՝ նախկին իշխանությանը գնահատական չի տալիս: Այսպես դժվար է վճիռ կայացնել»:
Ազատ Արշակյանը հավելեց, որ եթե քաղաքական գնահատական տրվի անցյալին և համարվի, որ պետությունը բռնազավթված է եղել ավազակախմբի կողմից, ապա պետք է ընդունել, որ նրանց դեմ արադարացի պայքար է եղել, և «Սասնա ծռեր»-ի գործողությունները պետք է դիտարկել որպես ապստամբություն: «Պետք է քաղաքական գնահատական տրվի նախորդ իշխանությանը, և անպայման «Սասնա ծռեր»-ի գործով պետք է կայացվի քրեական վճիռ:
Մանրամասն՝ տեսանյութում: