Բելառուսի իշխանությունները նախագահի թեկնածու Սվետլանա Տիխանովսկայային ընտրության առաջ են կանգնեցրել. կա՛մ լքել երկիրը, կա՛մ «այլ, ոչ այնքան հարմար տարբերակներ»: Այս մասին «Էխո Մոսկվի» ռադիոկայանի եթերում հայտարարել է Լիտվայի ԱԳՆ ղեկավար Լինաս Լինկյավիչուսը, հաղորդում է «ՌԻԱ Նովոստի»-ն:
«Նրան, ինչպես արդեն ասել ենք, ընտրության մեծ հնարավորություն չեն տվել. կամ լքել երկիրը, կամ ոչ այնքան հարմար տարբերակներ: Եվ նա որոշեց գալ, քանի որ վիզա ունի, և իշխանությունները նպաստել են դրան»,- ասվում է հաղորդագրության մեջ:
Ավելի վաղ Տիխանովսկայան այցելել էր Բելառուսի ԿԸՀ և քվեարկության արդյունքների վերաբերյալ բողոք էր ներկայացրել՝ օրենքի բացահայտ խախտումներով կատարված ձայների հաշվարկի կապակցությամբ և վերահաշվարկ պահանջել: Դրանից հետո մի քանի ժամ նրա հետ չեն կարողացել կապ հաստատել: Ավելի ուշ հայտնի է դարձել, որ նա ժամանել է Լիտվա:
Բելառուսում նախագահական ընտրությունները տեղի են ունեցել օգոստոսի 9-ին: Բելառուսի մի շարք քաղաքներում ընտրատեղամասերի փակվելուց հետո չարտոնված բողոքի ցույցեր են սկսվել ընդդեմ ընտրակեղծիքների, որի ընթացքում ոստիկանությունը և երկրի ներքին զորքերը ցուցարարների դեմ արցունքաբեր գազ, լուսաձայնային նռնակներ և ռետինե փամփուշտներ են կիրառել:
