Հայաստանում այսօր կրկին երկարաձգվել է արտակարգ դրության ռեժիմը մեկ ամսով, այդուհանդերձ պարետատունը մի շարք որոշումներ է կայացրել, որոնցով որոշ սահմանափակումներ հանվել են, այդ թվում նաև հանվել է հավաքներ, ցույցեր գործադուլներ անելու արգելքը:
Այս և այլ թեմաների շուրջ «Առաջին լրատվական»-ի հետ քննարկմանը մասնակցեցին քաղաքագետ, «Հանուն հանրապետության» նախաձեռնության անդամ Ռուբեն Մեհրաբյանը և Արմեն Հովհաննիսյանը:
Արմեն Հովհաննիսյանի խոսքով՝ կառավարությունն անընդհատ «պատանդն» էր այն լեգենդի,որ իբրև թե արտակարգ դրությունը սահմանվում է, որպեսզի մեծ միջոցառումներ՝ ցույցեր չլինեն, և այս որոշմամաբ այդ լեգենդը «ապամոնտաժվում» է»: «Պետք է որքան հնարավոր է արագ վերականգնվի բնականոն կյանքը»,- նշեց քաղաքագետը:
Քննարկման մասնակիցներն անդրադարձան նաև Բելառուսում տիրող իրավիճակին: Հիշեցնենք՝ Բելառուսում օգոստոսի 9-ին կայացած նախագահական ընտրություններում հաղթանակ է տարել գործող ղեկավար Ալեքսանդր Լուկաշենկոն: Բելառուսի տարբեր քաղաքներում և մայրաքաղաք Մինսկում բախումներ են տեղի ունեցել ցուցարարների և ոստիկանական ուժերի միջև, հայտարարվել է առնվազն մեկ զոհի մասին, կիրառվել են արցունքաբեր գազ, ռետինե մահակներ ու լուսաձայնային նռնակներ, ինչի հետևանքով կան տասնյակ վիրավորներ: Հազարավոր ցուցարարներ բերման են ենթարկվել:
«Սա լուրջ հարված էր հանրությանը: Այսօր տեղի է ունեցել բավական մեծ երթ երիտասարդության և սպիտակազգեստ (սպիտակը խաղաղության և ուժի բացառման խորհրդանիշ է) կանանց մասնացությամբ: Քաղաքացիներն իրավունք ունեն խաղաղ ընտրական գործընթացներով կառավարություն փոխել, իսկ Բելառուսում այդ իրավունքից խիստ զրկված են»,- նշեց Արմեն Հովհաննիսյանը՝ հավելելով, որ հասարակությունն իրավունք ունի և պետք է վերականգնի իր այդ հիմնարար իրավունքը:
Արմեն Հովհաննիսյանի դիտարկմամբ՝ Բելառուսի «էկզոտիկ» ռեժիմը նման է Հյուսիսային Կորեային. «Այդ վարչակարգը սկսել է փլուզվել, Բելառուսի ժողովուրդն այլևս չի կարող ապրել գաղջի և տիղմի մեջ, որի մեջ ապրել է 30 տարի»:
«Լուկաշենկոն բոլորի համար փորձանք է դարձել… Բելառուսում պայքարը կրում է ապակենտրոնացած բնույթ: Իրավիճակը կախված է ժամերի ընթացքում տեղի ունեցող իրադարձություններից»,- ընդգծեց Ռուբեն Մեհրաբյանը՝ հավելելով, որ համակարգ է փլուզվում:
Արմեն Հովհաննիսյանը հավելեց. «Ամենավատ սցենարը, որ դիտարկվում է, Բելառուսի բռնակցում է Ռուսաստանին»:
Մանրամասն՝ տեսանյութում:
