«Ամբողջ աշխարհում ոչ ոք չգիտի, թե որքան կտևի համավարակը, երկրորդ կյանք չի տրվելու, պետք է փորձել լիաթոք շնչել և ապրել այս պայմաններում: Ինչքան շուտ վերականգնենք կյանքի բոլոր ոլորտները՝ այդ թվում կրթությունը և մշակույթը, այնքան լավ»,- «Առաջին լրատվական»-ի հետ զրույցում այս մասին ասաց Երևանի Հովհ. Թումանյանի անվան տիկնիկային թատրոնի տնօրեն Ռուբեն Բաբայանը՝ անդրադառնալով դիտարկմանը, որ Հայաստանում արտակարգ դրությունը ևս մեկ ամսով երկարաձգվել է, որոշ սահմանփակումներ մեղմացվել են:
Ցույցեր, հավաքներ, գործադուլներ անելու արգելքը վերացել է, և շատերը գուժում են թեժ աշնան մասին. անդրադառնալով այս դիտարկմանը և հարցին, թե կա՞ հանրության մոտ կուտակված էներգիա, որը պետք է պարպվի փողոցում, Ռուբեն Բաբայանը նշեց, որ քաղաքական ակտիվության մեջ վատ բան չի տեսնում. «Բոլոր ժողովրդավարական երկրներում մշտապես տեղի են ունենում ցույցեր, գործադուլներ, երթեր, և դա ճիշտ է, այդ քաղաքական խմորումները ցույց են տալիս, որ երկրում ինչ-որ բան կարող է փոխվել: Եթե երկրում այդպիսի ոչ մի բան տեղի չի ունենում, դա ոչ թե նրանից է, որ բոլորը գոհ են, այլ նրանից է, որ ոչ ոք չի համարձակվում ձայն հանել, այնտեղ բռնատիրականան կարգեր են: Պրոբլեմներ կան բոլոր երկրներում, պրոբլեմներ չկան միայն գերեզմանատանը: Ես չեմ ուզում, որ մեր երկիրը նմանվի գերեզմանատան: Այստեղ պետք է բուռն քաղաքական կյանք ընթանա»:
«Մեծ վտանգ կա, որ կարող ենք շատ շուտ վերադառնալ նախկին կարգավիճակին..․ Չենք որոշել՝ ինչից ենք հրաժարվում»,- ընդգծեց մեր զրուցակիցը:
Մանրամասն՝ տեսանյութում: