«Սասնա ծռեր»-ի կողմից ՊՊԾ գնդի գրավման գործով դատաքննությունն ավարտվեց։ Դատավոր Մեսրոպ Մակյանի նախագահությամբ կայացած նիստում դատախազները հանդես եկան մեղադրական ճառերով: Դատախազը նշեց, որ կատարված հանցագործությունները հանրային չափազանց մեծ վտանգավորություն են ներկայացնում, և ամեն մեղադրանքը առանձին 8-10 տարվա ազատազրկում է նախատեսում: Ըստ մեղադրական ճառի, խմբի անդամները պատանդ են վերցրել գնդի տարածքում ծառայություն իրականացնող ոստիկաններից մի քանիսին: Բացի դրանից՝ հիմնավորվել է, որ խմբի անդամները սպանել են ոստիկաններ Արթուր Վանոյանին, Յուրի Տեփանոսյանին և Գագիկ Մկրտչյանին։ Ոստիկանների սպանության մեջ մեղադրվում են զինված խմբի անդամներ Սմբատ Բարսեղյանն ու Արմեն Բիլյանը։
Եվ այսպես՝ դատախազը պահանջեց Պավլիկ Մանուկյանին դատապարտել 9 տարվա ազատազրկման, Գագիկ Եղիազարյանին՝ 8 տարի վեց ամիս ժամկետով, Արեգ Կյուրեղյանին ազատազրկել 8 տարի 6 ամիս ժամկետով, Վարուժան Ավետիսյանին՝ 8 տարի 9 ամիս ժամկետով, Արայիկ Խանդոյանի նկատմամբ քրեական հետապնդումը դադարեցնել՝ անձի մահվան հիմքով, Սմբատ Բարսեղյանին՝ ցմահ ազատազրկման, Արմեն Բիլյանին՝ 21 տարի ժամկետով, Սեդրակ Նազարյանին ազատազրկել 9 տարի ժամկետով, Էդվարդ Գրիգորյանին՝ 8 տարի վեց ամիս և Մխիթար Ավետիսյանին 8 տարի 9 ամիս ժամկետով ազատազրկման:
«Սասնա ծռեր» խմբի անդամների վրա համաներում չի տարածվելու, քանի որ ավելի վաղ տուժողներն առարկել էին։
Սպանված ոստիկաններից Գագիկ Մկրտչյանի մայրը՝ տիկին Անահիտը, «Առաջին լրատվական»-ի հետ զրույցում անդրադառնալով դատախազի պահանջած պատժաչափերին, ասաց, որ համաձայն չէ դրանց հետ։ Նրա խոսքերով՝ «նրանք բոլորը պետք է ցմահ նստեն»։ «Սա ինձ չի բավարարում։
Նրանք բոլորը պետք է ցմահ նստեն։ Նրանք ավելի խիստ պատիժ պետք է ստանան։ Ամեն մեկն իր արժանի պատիժը պետք է ստանա։ Նրանք մարդասպաններ են։ Իմ տղայի վրա ձեռք բարձրացնողը ոչ թե 10 կամ 20 տարի պետք է ստանա, այլ պետք է ցմահ դատվի։ Նա ամբողջ կյանքը, քանի դեռ կենդանի է, բերդում պետք է փտի։ 21 տարին քիչ է ինձ համար։։ Ես ցավում եմ, որ գնդակահարության հոդված չկա։ Ես կուզենայի, որ նրանց գնդակահարեին, բայց քանի որ նման հոդված չկա, թող ոչ մի ներում, ոչ մի համաներում, ոչ մի մեղմացում չկիրառվի, ու նրանք պետք է փտեն բանտում։ Նրանք պետք է տառապեն իմ տղային անմեղ տեղը կյանքից զրկելու համար։ Նրանք ինձանից բեթար պետք է տառապեն, քանի որ ազգի դավաճան, ոճրագործ, մարդասպան են»,- ասաց Գագիկ Մկրտչյանի մայրը։
Յուրի Տեփանոսյանի հայրը՝ Վահրամ Տեփանոսյանը, սակայն, «Առաջին լրատվական»-ի հետ զրույցում ասաց, որ համաձայն չէ մեղադրող դատախազների հետ, հրապարակված պատժաչափերի հետ։ Նա շարունակում է պնդել, որ իր որդուն «ծռերը» չեն սպանել, այլ ոստիկանները; «Սաղ սուտ է, Սմբատ Բարսեղյանը մեղավոր չէ իմ որդու սպանության համար։ Էդ տղան անմեղ է։ Էդ Սերժի, Վովա Գասպարյանի, Գուրգեն Գրիգորյանի սցենարն էր։ Նրանք սարքեցին էս ամենը։ Մնացած ամեն ինչ սուտ է։ Արմեն Բիլյանն էլ է անմեղ։ Նա չի սպանել Գագիկ Մկրտչյանին»,- հայտարարեց Տեփանոսյանը՝ հավելելով, որ ով որ մտածի, կասկածի, որ ինքը կաշառվել է նման պնդումներ անելու համար, կամ «Սասնա ծռեր»-ի կողմնակից է, թող մեռնեն, քանի որ նման մարդիկ սրիկաներ են։ «Ամբողջ աշխարհն էլ գիտի, որ Յուրային սպանել են ոստիկանները։ Բայց իմ տղայի սպանությունը բարդեցին էդ հարիֆի՝ Սմբատ Բարսեղյանի վրա։ Գագիկ Մկրտչյանի սպանությունն էլ սարքեցին Արմեն Բիլյանի գլխին, բայց գնացեք հիվանդանոց, մի քիչ հետաքրքրվեք, կտեսնեք, որ նրան սրսկեցին, մեռավ։ Ինչ Արմեն Բիլյան, ինչ բան։ Նրանք խելոք, խեղճ, մարդիկ էին, նրանք չէին եկել մարդ սպանելու համար, նրանք մարդասպան չէին։ Նրանք կարող էին թուրք սպանել, բայց ոչ հայ։ «Ծռերը» ՊՊԾ գունդ չէին մտել հային սպանելու համար»,- ասաց Տեփանոսյանը՝ ավելացնելով, որ ոչ մի կերպ համաձայն չէ հրապարակված պատժաչափերի հետ։
Նշենք, սակայն, որ Յուրի Տեփանոսյանի կինը, ի տարբերություն Վահրամ Տեփանոսյանի, իր ամուսնու մահվան մեջ մեղադրում է «Սասնա ծռեր»-ին՝ ամբողջությամբ չկիսելով իր սկեսրայրի դիրքորոշումը։
Լուսանկարը՝ Photolure-ի