Բրեստում ուժայինները կրակ են բացել ծառայողական զենքերից ցուցարարների հետ բախման ժամանակ, հաղորդում է «Ինտերֆաքս»-ը՝ երկրի ՆԳՆ-ի հաղորդագրությանը հղումով:
«Բրեստում մի խումբ ագրեսիվ քաղաքացիներ, արմատուրան ձեռքներին, հարձակվել են ոստիկանության աշխատակիցների վրա: Դեպի վեր ուղղված նախազգուշական կրակոցները չեն կանգնեցրել նրանց «…» Հարձակվողներից մեկը վիրավորվել է»,- ասվում է հաղորդագրության մեջ:
Միջադեպի մասին ընդդիմության ներկայացուցիչները տեղեկատվություն չեն հաղորդել:
Ուժայինների տվյալներով, անցած գիշեր Բելառուսում բողոքի ցույցերի ընթացքում տուժել է ավելի քան 50 մարդ:
Բելառուսում նախագահական ընտրությունները տեղի են ունեցել օգոստոսի 9-ին: Բելառուսի մի շարք քաղաքներում ընտրատեղամասերի փակվելուց հետո չարտոնված բողոքի ցույցեր են սկսվել ընդդեմ ընտրակեղծիքների, որի ընթացքում ոստիկանությունը և երկրի ներքին զորքերը ցուցարարների դեմ արցունքաբեր գազ, լուսաձայնային նռնակներ և ռետինե փամփուշտներ են կիրառել:
Ցուցարարները պահանջում են քվեարկության արդյունքների վերահաշվարկ, քաղբանտարկյալներին ազատ արձակում և երկրի նախագահ Ալեքսանդր Լուկաշենկոյի հրաժարականը: Բողոքի ցույցերի երեք օրվա ընթացքում ձերբակալվել են մի քանի հազար մարդ, այդ թվում՝ տասնյակ լրագրողներ:
