ՍԴ դատավորի թափուր պաշտոնում Վճռաբեկ դատարանի նախագահ Երվանդ Խունդկարյանի առաջադրվելուց հետո տևական ժամանակ է կրկին խոսվում է «Բարսիս» ՍՊԸ-ի գործի մասին։ Հիշեցնենք, որ դեռևս անցած տարի համացանցում տեղեկություն տարածվեց, որ Վարչական դատարանի նախկին դատավոր Ռոբերտ Սարգսյանը 2016-ին նամակ է գրել Վճռաբեկ պալատի նախագահ Արման Մկրտումյանին: Ըստ այդ նամակի՝ «Բարսիս» ՍՊԸ-ն ունեցել է մոտ 1.000.000 ԱՄՆ դոլարի հարկային պարտավորություն: Որպեսզի պետական բյուջե չվճարի այդ գումարը, ընկերությունը դիմել է դատարան և 250.000 ԱՄՆ դոլար կաշառք տվել, և դատարանը նրան ազատել է հարկային պարտավորությունից: Ըստ տեղեկությանը տիրապետողների՝ կաշառք տալուն և վերցնելուն օժանդակող, կազմակերպիչ, կատարող և դրդիչ համապատասխան դերակատարմամբ եղել են ՀՀ Վճռաբեկ պալատի նախկին նախագահ Արման Մկրտումյանը, ՀՀ Վճռաբեկ դատարանի քաղաքացիական և վարչական պալատի նախագահ, այժմ Վճռաբեկ պալատի նախագահ Երվանդ Խունդկարյանը, ՀՀ Վարչական դատարանի նախկին նախագան Կարեն Մաթևոսյանը, ՀՀ Վճռաբեկ դատարանի քաղաքացիական և վարչական պալատի դատավոր Սուրեն Անտոնյանը, ՍՊԸ ընկերության հիմնադիր տնօրեն Գեղամ Նշանի Բարսեղյանը, ՍՊԸ ներկայացուցիչ, փաստաբան-իրավաբան Գևորգ Չաքմիշյանը և վճիռը կայացրած՝ Վարչական դատարանի դատավոր Ռոբերտ Սարգսյանը: Ըստ հրապարակված տեղեկատվության՝ Ռոբերտ Սարգսյանը նամակում նշում է, որ «Բարսիս» ՍՊԸ-ի կողմից, հայցը բավարարելու և օրինական ուժի մեջ մտած դատական ակտ տալու համար, ՀՀ Վճռաբեկ դատարանին տրվել է 250 000 ԱՄՆ դոլարի գումար, սակայն Վճռաբեկ դատարանը 250.000 ԱՄՆ դոլար կաշառք վերցնելուց հետո որոշում է «գցել» վճիռ կայացրած դատավոր Ռոբերտ Սարգսյանին և նրան տալ ընդամենը 8000 ԱՄՆ դոլար: Վերջինս, սակայն, չի համաձայնվում դրան և նամակ է գրում Վճռաբեկ պալատի նախագահ Արման Մկրտումյանին, որով մեղադրում է վերջինիս և հանցավոր խմբավորման մյուս անդամներին իրեն գցելու մեջ, պարզաբանում է, որ, ըստ ընդունված կարգի, վճիռ կայացրած դատավորին պետք է հասնի կաշառքի գումարի 40%-ը, այն է՝ 100.000 ԱՄՆ դոլար, պահանջում է Վճռաբեկ դատարանի նախագահից եռօրյա ժամկետում իրեն վճարել այդ գումարը, հակառակ դեպքում սպառնում է իրեն գցելու գործով դիմել նախագահին՝ Սերժ Սարգսյանին:
Այս գործի մասին երեկ «Առաջին լրատվական»-ի հետ զրույցում խոսեց նաև գործարար Մանվել Տեր-Առաքելյանը։
Նրա խոսքերով՝ Երվանդ Խունդկարյանի գնալը ՍԴ արդարադատության հետ ոչ մի առնչություն չունի։ «Այդ մարդկանց օրոք ՀՀ դատական համակարգը գահավիժել է անդունդը։ Ռոբերտ Սարգսյանը ևս գրառում էր կատարել, թե ինչպես են Վճռաբեկ դատարանում 250 հազար ԱՄՆ դոլարով 1 միլիոն դոլարանոց գործը փակել։ Վճռաբեկ դատարանում ֆուտբոլ են խաղացել։ Մի մարդ, որի անունը շոշափվում է այդ գործարքի մեջ, նախկին դատավոր Ռոբերտ Սարգսյանը ևս պատմում է այս սխեմաների մասին, ու այդ մարդը իր թեկնածությունը առաջադրում է Բարձր դատարանում, դա անթույլատրելի է։ Դրանից հետո ՀՀ արդարադատության դռները պետք է փակել»,- ասաց Տեր-Առաքելյանը։
Ռոբերտ Սարգսյանը, որը ներկայումս դատավոր չէ, «Առաջին լրատվական»-ի հետ զրույցում չցանկացավ անդրադառնալ այս գործի մանրամասներին։ Նա հերքեց Վճռաբեկ դատարանի նախկին նախագահին նամակ գրելու և այդ նամակում կաշառքը ոչ ճիշտ բաշխելու մանրամասներ ներկայացնելու մասով տեղեկությունը։ «Ամեն բան այդպես չի եղել։ Ես չեմ ասել, թե ինձ խոստացված կաշառքից քիչ է տրվել։ Այդպես չէ։ Ինչ-որ կա քրեական գործում, արտացոլված է և դա նման չէ ձեր ասածին»,- ասաց Սարգսյանը։
Նախկին դատավորն ինքն է դիմել իրավապահներին և տեղեկացրել, որ իր անունից հիշատակված գործով կաշառք են վերցրել, որի մասին ինքը հետո է իմացել։ Գործը քննվել է, սակայն Սարգսյանին այդպես էլ տուժող չեն ներգրավել այս գործով։ Նա պարզապես դիմողի կարգավիճակ ունի, սակայն գործն արդեն Վերաքննիչ դատարանում է։ «Դատական գործընթաց է գնում դրա հետ կապված, և ես չեմ ցանկանում շատ բան ասել այդ գործից։ Այսքանը»,- ասաց Սարգսյանը։