Բելառուսում հետընտրական իրավիճակը շարունակում է մնալ բարդ և լարված. ցույցեր և բախումներ են տեղի ունենում ոչ միայն Մինսկում, այլ նաև Բելառուսի տարբեր այլ քաղաքներում: Անկասկած է, որ փորձության շեմին է հայտնվել ոչ միայն Բելառուսը, այլև ԵԱՏՄ-ն, որի կազմում է նաև Հայաստանը:
Թեմայի շուրջ «Առաջին լրատվական»-ի հետ քննարկմանը մասնակցեցին «Անտարես» հրատարակչության տնօրեն Արմեն Մարտիրոսյանը, ԱԺ «Իմ քայլը» խմբակցության պատգամավոր Հովիկ Աղազարյանը և քաղտեխնոլոգ Կարեն Քոչարյանը:
«Լուկաշենկոն գնում է իշխանությունը պահելու ճանապարհով, բայց տարբերություն կա՝ համեմատած մյուս հանրապետությունների հետ,- նշեց Կարեն Քոչարյանը՝ հավելելով, որ այստեղ ավելի շատ ռուսների մատն է խառը: Քաղտեխնոլոգի դիտարկմամբ՝ Լուկաշենկոն չի կորցնի իշխանությունը, բայց Ռուսաստանի կողմից ամեն ինչ կարվի, որ նա ոչ լեգիտիմ ղեկավար լինի, որպեսզի «դամոկլյան սուրը» միշտ գլխին կախված լինի:
Արմեն Մարտիրոսյանի դիտարկմամբ՝ Բելառուսում տեղի ունեցող դեպքերը հետընտրական պրոցես են, բայց տարիների ընթացքում հասունացած: «Մարդիկ հոգնել են Լուկաշենկոյից, իշխանությունները պետք է շուտ-շուտ փոխվեն: Հասարակության մեջ պայթյունավտանգ իրավիճակ է ստեղծվել, բայց Բելառուսը պայքարի փորձ չունի՝ ի տարբերություն Հայաստանի… Անկախ նրանից, թե ովքեր են ուզում, որ Բելառուսում փոփոխություններ լինեն, եթե ըմբոստները կարողանան հաղթանակել, կանխատեսելի չէ, թե ինչ կլինի: Այսպես թե այնպես Բելառուսը առաջվանը չէ… Ոչ մի դիկտատոր հավերժ չէ, ժողովուրդը միշտ էլ մի օր հաղթում է»,- նշեց Արմեն Մարտիրոսյանը:
Անդրադառնալով դիտարկմանը, որ Բելառուսի ընդդիմությունը մնացել է առանց լիդերի, և ընդդիմության թեկնածուն հեռացել է երկրից, Արմեն Մարտիրոսյանը նշեց, որ, իր կարծիքով, բելառուսական ըմբոստությունը կապ չունի լիդերի հետ, խնդիրն այն չէ, թե ով կգա իշխանության, այլ այն, որ Լուկաշենկոն հեռանա:
Քննարկման մասնակիցների դիտարկմամբ՝ ՀԱՊԿ-ը չի միջամտի Բելառուսում տեղի ունեցող գործընթացներին: Նրանք նաև կարծիք հայտնեցին, որ Բելառուսում տեղի ունեցող դեպքերն այսօր չեն սպառնում ԵԱՏՄ-ին:
«Բելառուսում ստեղծվում են այն հիմքերը, որոնց հիման վրա հետագայում փոփոխություններ կլինեն»,- նշեց Կարեն Քոչարյանը՝ հավելելով, որ շատ կարևոր է, որ շարժումը լիդեր ունենա:
«Բելառուսը Եվրոպայի սրտում «խոց» էր, այնտեղ դեմոկրատիա չկա,- նշեց Արմեն Մարտիրոսյանը: Նա նաև ընդգծեց, որ Բելասուսում «Ջինը բաց է թողնված», ինքը կորոշի՝ ինչ կլինի:
Անդրադառնալով ընտրվելու կապակցությամբ Լուկաշենկոյին ուղղված ՀՀ վարչապետի շնորհավորանքին, Արմեն Մարտիրոսյանը նշեց, որ Փաշինյանի շնորհավորանքը բխում է մեր պետության շահերից:
Մանրամասն՝ տեսանյութում: