Սահմանապահ գյուղերում, տավուշյան դեպքերից հետո, երբ ադրբեջանական կողմը սադրանքների դիմեց և թիրախավորեց ՀՀ սահմանապահ ու սահմանամերձ բնակավայրերը, ավիրելով ու քանդելով խաղաղ բնակչության տները, վերակառուցման աշխատանքները գրեթե ավարտական փուլում են։
Չինարի գյուղում, որտեղ հակառակորդի մոտ 50 արկ էր ընկել, վնասվել էր մոտ 20 տուն, որից մեկը հիմնովին։ Չինարիի համայնքապետ Սամվել Սաղոյանի տեղեկացմամբ՝ կառավարության ֆինանսավորմամբ սկսվել են 10 հոգանոց ընտանիքի համար նոր տան կառուցման աշխատանքները, որտեղ կա 5 անչափահաս և հաշմանդամություն ունեցող երեխա։ «Շատ մեծ ու հարմարավետ տուն է կառուցվում 10 հոգանոց ընտանիքի համար։ Շնորհակալ ենք վարչապետին։ Տունը 120 քառակուսի մետր ապաստարան ունի։ Մեծ աշխատանքներ են կատարվում, հատուկ շինարարներ են գալիս, ամեն ինչ նորմալ է»,- «Առաջին լրատվական»-ի հետ զրույցում ուրախությամբ հայտնեց Սաղոյանը։
Մյուս վնասված տների մասին սահմանապահ համայնքի ղեկավարը տեղեկացրեց՝ երեք տան վերականգնման աշխատանքները վաղը կավարտվեն, 7-8 տան վերականգնման աշխատանքներ արդեն ավարտվել են։ «Մի քանի տներում ներկարարական աշխատանքներ են ընթացանում, պատուհանները, դռները պատվիրել ենք։ Մոտ մեկ շաբաթից ամբողջովին կավարտենք աշխատանքները»,- փոխանցեց Չինարիի համայնքապետը։
Սահմանապահ մյուս համայնքը, որը ևս շատ է տուժել հակառակորդի գործողություններից, Այգեպարն է, Ներքին Կարմիրաղբյուրը։ Տարբեր չափերի վնասով մոտ 70 տուն կա, որոնց վերակառուցման, վերանորոգման աշխատանքները շարունակվում են։ Բերդի համայնքապետ Հարություն Մանուչարյանը «Առաջին լրատվական»-ի հետ զրույցում տեղեկացրեց, որ մոտ 10 օրից կավարտվեն բոլոր տների շինարարական աշխատանքները, իսկ նոր կառուցվող տները նախատեսվում է ավարտել մինչև հունվարի 1-ը։ «4-5 բրիգադ համալրված աշխատում են։ Մեկ ժամ առաջ եմ այնտեղից եկել, բոլոր տեղերում մարդիկ աշխատում են։ Այգեպարում կա տուն, որտեղ չեն ապրելու, նոր տուն են գնելու, կա տուն, որի վնասը փոքր է, տարբեր չափի վնասներ են։ Ամենաշատը Այգեպարում է վնասվել։ Շինարարությունը հնարավորինս արագ է կատարվում»,- փոխանցեց Բերդի համայնքապետը։
