«Սևան» ազգային պարկի տարածքում՝ Սևանա լճի ափամերձ գոտում ունենք ապօրինի հողազավթումների և ինքնակամ կառուցապատումների զուգակցությամբ շուրջ 130 տնտեսվարման դրվագ, ինչպես նաև 150 պայմանագրային վարձակալությամբ գործունեության դեպքեր՝ առանց պետական գրանցման: Այս մասին ֆեյսբուքյան իր էջում հայտնել է շրջակա միջավայրի նորանշանակ նախարար Ռոմանոս Պետրոսյանը։
«Եվ վերջապես՝ տասնամյակներով վարձակալության և կառուցապատման իրավունքով գործող շուրջ 1000 տնտեսվարող՝ որի գործունեության բնույթը, իրավաչափությունն ու սահմանված կարգին համապատասխանությունը դեռ պետք է ուսումնասիրվի միջնաժամկետ կտրվածքով: Սա միայն ափամերձ հողերի մասով։
Իսկ բնության հատուկ պահպանվող՝ ափամերձ տարածքներում կառուցված ապօրինի շենք-շինությունների ընդհանուր քանակն այս պահին շուրջ 3.800 հատ է՝ բոլորը ենթակա ապամոնտաժման և քանդման։
Կարճաժամկետ հեռանկարում մեր առաջնային խնդիրն է՝ պետական բացառիկ սեփականություն հանդիսացող տարածքներն ազատել ապօրինի տաղավարներից, ինքնակամ շենք-շինություններից, պարիսպներից ու կենսական կարևորության այս ոլորտում հաստատել օրենքի գերակայություն:
Այս ամենի գերնպատակը մեկն է՝ վերականգնել մեր բնաշխարհի անգնահատելի գոհարի՝ Սևանա լճի էկոհամակարգը»,- գրել է նախարարը:
«Առաջին լրատվական»-ի հետ զրույցում բնապահպան-փաստաբան Նազելի Վարդանյանը դրական գնահատեց նախարարի այս նախաձեռնությունը՝ շեշտելով, որ տարիներ շարունակ Սևանա լճի ափամերձ տարածքներում ՀՀ օրենսդրության խախտումներով բազմաթիվ հողամասեր են հատկացվել:
«Վերջապես շրջակա միջավայրի նախարարը վճռական է տրամադրված այդ ապօրինությունները վերացնելու հարցում, և ես իրեն հաջողություն եմ մաղթում այդ գործում: Միշտ պատրաստ եմ իրավական աջակցություն ցուցաբերել բնապահպանական ցանկացած լավ նախաձեռնության»,-շեշտեց Նազելի Վարդանյանը:
Եթե խնդիրը դիտարկենք տնտեսական գործունեության տեսանկյունից, ապա, ի՞նչ եք կարծում, կառավարությունը մինչև վերջ հետամուտ կլինի Սևանի հետ կապված այս նպատակի իրագործմանը. ի՞նչ հնարավոր հետևանքներ կարող են լինել այդ դեպքում,- հետաքրքրվեցինք մեր զրուցակցից:
«Հուսով եմ, որ կգնան մինչև վերջ և կվերացնեն բոլոր խախտումները՝ առանց բացառությունների, հակառակ դեպքում՝ անիմաստ է սկսել: Անհրաժեշտ է Ազգային պարկի տնօրինության վրա դնել Սևանա լճի ափամերձ տարածքների պահպանության և մաքրության ապահովման պարտականությունը:
Սևանա լճի ափամերձ տարածքը պետության բացառիկ սեփականությունն է և ՀՀ Հողային օրենսգրքի 60-րդ հոդվածի համաձայն՝ ենթակա չէ սեփականության իրավունքով փոխանցման: Հաշվի առնելով, որ դա նաև բնության հատուկ պահպանվող տարածք է` պետք է սահմանված լինի հատուկ պահպանության ռեժիմ և օգտագործման որոշ սահմանափակումներ ու պահանջներ: Այդ ապօրինությունները վերացնելը պահանջում է հետևողական և երկարատև աշխատանք, որոշ դեպքերում կպահանջվեն նաև դատական գործընթացներ:
Իմ խորին համոզմամբ՝ ցանկացած տնտեսավարող պետք է գործի ՀՀ օրենսդրության պահանջներին համապատասխան՝ հարգելով բնության օբյեկտների ընդհանուր օգտագործման հանրության իրավունքը»,- պատասխանեց նա:
Վերջինս նաև համոզված է, որ ցանկալի արդյունքի հասնելու համար այս նախաձեռնությունը շատ կարևոր է, սակայն բավարար չէ Սևանի բոլոր խնդիրները լուծելու և դրա երբեմնի էկո-համակարգը վերականգնելու համար:
«Անհրաժեշտ է մշակել Սևանի առողջացման ռազմավարություն և գործողությունների պլան ու համակարգված ձևով իրականացնել բոլոր անհրաժեշտ միջոցառումները Սևանա լճի վրա բացասական ազդեցությունը վերացնելու և հետագայում բացառելու համար»,- եզրափակեց Նազելի Վարդանյանը:
