Փարիզն ակնկալում է, որ Լիբանանի ապագա կառավարությունը կսկսի բարեփոխումներ իրականացնել՝ դրանով իսկ կանխելով երկրում քաղաքական և տնտեսական փլուզումը, հաղորդում է ՏԱՍՍ-ը՝ հղում անելով Ֆրանսիայի արտգործնախարարության հայտարարությանը:
«Այժմ առաջնահերթություն պետք է տրվի կառավարության շուտափույթ ձևավորմանը, որը պետք է իրականացնի Բեյրութի վերակառուցումը և բարեփոխումներ իրականացնի, առանց որոնց երկիրը կհայտնվի տնտեսական, սոցիալական և քաղաքական տապալման եզրին», – ասված է նախարարության հաղորդագրության մեջ:
Ավելի վաղ, հազարավոր մարդիկ Բեյրութում դուրս էին եկել հակակառավարական ցույցի՝ պահանջելով բարեփոխումներ և կառավարության հրաժարականը: Հանրահավաքը զանգվածային անկարգությունների էր վերածվել: Բախումների արդյունքում ավելի քան 700 մարդ վիրավորվել էր:
Ավելի ուշ Լիբանանի վարչապետ Հասան Դիաբը հայտարարեց կառավարության հրաժարականի մասին:
