Կառավարությունը խորհրդարան է ուղարկել «Հանրային ծառայության մասին» և կից ներկայացված նախագծերի փաթեթը, որով առաջարկվում է ընդլայնել Կոռուպցիայի կանխարգելման հանձնաժողովի լիազորությունները:
Ըստ այդմ, նախ՝վերանայվել է հայտարարատու պաշտոնատար անձանց ցանկը. հայտարարագրման պարտականություն է սահմանվել նաև Երևան համայնքի աշխատակազմի քարտուղարի, Երևանի ավագանու անդամների, ինչպես նաև այն համայնքների ավագանիների համար, որոնք ունեն 15 հազար և ավելի բնակչություն:
Ամենաառանցքային առաջարկը, թերևս, այն է, որ Կոռուպցիայի կանխարգելման հանձնաժողովը, նախագծի ընդունման պարագայում, լիազորություն է ստանալու դիմելու օպերատիվ–հետախուզական գործունեություն իրականացնող մարմիններին` հայտարարագրերի վերլուծության ընթացքում պաշտոնատար անձի գույքի փաստացի տիրապետումը ստուգելու և քրեական ենթամշակույթին հարելու հնարավորության ուսումնասիրության նպատակով: Հայտարարագրերի վերլուծության ընթացքում գույքի փաստացի տիրապետումը ստուգելն ուղղված է հայտարարագրի կեղծ տվյալը, տվյալի թաքցնելը կամ ապօրինի հարստացումը հայտնաբերելու համար, ինչը գործող կարգավորմամբ առկա չէ:
Առաջարկվում է նաև պաշտոնատար անձի կողմից փաստացի տիրապետվող անշարժ գույքը, տրանսպորտային միջոցները հայտարարագրելու պահանջ սահմանել: Տարանջատում է իրականացվում նաև ստացած վարկերի և փոխառությունների միջև:
Ուշագրավ է նաև, որ կոռուպցիոն ռիսկերի նվազեցման համար առաջարկվում է ներդնել մեխանիզմ, որը հնարավորություն կտա պաշտոնատար անձի լիազորությունների դադարումից երկու տարի անց գույքի և եկամուտների իրավիճակային հայտարարագիր պահանջել:
Նկատենք, որ, ըստ նախագծի`պաշտոնատար անձինք պետք է ներկայացնեն գույքի, եկամուտների, շահերի և ծախսերի հայտարարագիր: Նախագծերը մշակվել են Արդարադատության նախարարության կողմից:
Ըստ հիմնավորման`այս փոփոխություններով ակնկալվում է կատարելագործել հայտարարագրման ինստիտուտը, ինչը հնարավորություն կտա ապահովել հայտարարատու պաշտոնատար անձանց գործունեության թափանցիկությունը:
«Առաջին լրատվական»-ի հետ զրույցում նախկին փոխոստիկանապետ, փաստաբան Հովհաննես Քոչարյանը նշեց, որ առաջարկվող փոփոխություններն ունեն իրավաչափ նպատակ և համահունչ են կոռուպցիայի կանխարգելման ոլորտում հայտարարված նպատակներին, սակայն օպերատիվ- հետախուզական մարմինների հետ համագործակցության և մարդու իրավունքների պաշտպանության հարցերով առկա են լրջագույն բացեր, որոնք կարող են անգործության և կամայականությունների տեղիք տալ:
«Նախ՝ այդպես էլ հասկանալի չէ՝ գույքի փաստացի տիրապետման և քրեական ենթամշակույթին հարելու մասին տեղեկատվության ստուգում իրականացնելու դիմումները օպերատիվ-հետախուզական գործունեություն իրականացնելու հիմքե՞ր են, թե՞ ոչ: Եթե հիմքեր են, ապա դրանց հիման վրա օպերատիվ ստորաբաժանումները հետախուզական միջոցառումներ իրականացնելու որոշումներ ընդունելո՞ւ են, թե՞ ոչ: Կարո՞ղ են արդյոք որոշումը և/կամ օպերատիվ միջոցառումների արդյունքները հասանելի լինել անձին, որի նկատմամբ այդ միջոցառումներն իրականացվել են, անձը նախազգուշացվելո՞ւ է արդյոք, որ նրա նկատմամբ իրականացվել կամ իրականացվելու են օպերատիվ հետախուզական միջոցառումներ կոռուպցիայի կանխարգելման հանձնաժողովի դիմումի հիման վրա, գաղտնագրման ենթակա՞ են արդյոք այդ տեղեկությունները, եթե այո՝ ապա ե՞րբ կարող են գաղտնազերծվել: Այս հարցերի պատասխանները պետք է կարգավորել օրենսդրորեն, հակառակ պարագայում՝ կամայականությունների համար պարարտ հող է առաջանում»,- ընդգծեց Հովհաննես Քոչարյանը:
Վերջինիս խոսքերով՝ օպերատիվ-հետախուզական ստորաբաժանումների միջոցառումների արդյունքները պետք է ուղարկվեն կանխարգելման հանձնաժողով՝ օպերատիվ-հետախուզական գործունեություն իրականացնող մարմինների ստորագրությամբ, ինչը հնարավորություն կտա որոշակիորեն ուժեղացնել ներգերատեսչական հսկողությունը գործընթացի նկատմամբ:
«Ամեն դեպքում, այս գործընթացը չպետք է դուրս մնա դատական վերահսկողության շրջանակներից, և սրա կապակցությամբ անհրաժեշտ են հստակ իրավական երաշխիքներ, ու երաշխիքները պետք է տրվեն օրինագծերի փաթեթով»,- ասաց փաստաբանը:
Ինչ վերաբերում է պաշտոնատար անձի լիազորությունների դադարեցումից երկու տարի անց գույքի և եկամուտների իրավիճակային հայտարարագրի պահանջին, ապա Քոչարյանը դրական գնահատեց ու ճիշտ վերահսկողական գործառույթ համարեց: