Մոտ մեկ շաբաթ առաջ Բեյրութում պայթյունի հետևանքով առնվազն 160 մարդ է զոհվել, կան 5 հազարից ավելի վիրավորներ, վնասվել են բազմաթիվ շենք-շինություններ, կան անտուն մնացած մարդիկ։ Հայաստանի կառավարությունը պլանավորել է 3 ավիաչվերթով օգնություն ուղարկել Լիբանան։ Արցախից ու Հայաստանից արդեն 2 ինքնաթիռ ուղարկվել է Լիբանան՝ տանելով առաջին անհրաժեշտության օգնություն։ Այսքանով, սակայն, մեր օժանդակությունն Լիբանանին ու Լիբանանի հայ համայնքին չի ավարտվում։
Ինչպիսի՞ն է իրավիճակը Բեյրութում․ «Առաջին լրատվական»-ի հարցին «Հայաստան» համահայկական հիմնադրամի տնօրեն Հայկակ Արշամյանը, որն այս օրերին գտնվում է Բեյրութում, պատասխանեց․ «Հիմա Բեյրութում իրավիճակը տարբերվում է առաջին օրերից։ Այս ընթացքում մենք շրջել ենք համայնքում, բազմաթիվ հանդիպումներ ենք անցկացրել։ Համայնքն արդեն հասցրել է մաքրել բոլոր ապակիները և նույնիսկ վերականգնման աշխատանքներ են սկսել։ Սակայն, ընդհանուր առմամբ, իրավիճակը լավ չի ավերվածությունների առումով՝ գրեթե չկա մի հայկական դպրոց, որը չի տուժել այդ պայթյունից։
Հիմա Կիլիկիո կաթողիկոսության հովանու ներքո հատուկ հանձնախումբ է ստեղծվել, որն այժմ ինտենսիվ աշխատում է, որպեսզի հասկանան վնասի չափը՝ ամբողջը չափագրեն, հավաքագրեն, քարտեզագրեն և տեսնեն, թե ինչ կարելի է անել»։
Իսկ «Հայաստան» համահայկական հիմնադրամն ի՞նչ առաքելությամբ է հիմա Բեյրութում, և այս մեկ շաբաթվա ընթացքում ի՞նչ է նախաձեռնել համայնքին օժանդակելու համար․ «Առաջին լրատվական»-ի հարցին Հայկակ Արշամյանը պատասխանեց․ «Հիմնադրամը մի քանի օր առաջ սկսեց դրամահավաքը լիբանանահայությանը օժանդակելու նպատակով, և այսօր արդեն 125 հազար դոլարից ավելի գումար է հավաքագրվել։ Իսկ այստեղ մեր գալու նպատակը նույնն է՝ մարդկանց հետ խոսել, զրուցել, հասկանալ, ընդգծել, այսինքն՝ հիմնականում փաստագրական նպատակով ենք եկել»։
Մանրամասները՝ տեսանյութում։