Բելառուսում երեկ կայացած նախագահական ընտրություններից հետո կտրուկ ու աննախադեպ կերպով սրվել է իրավիճակը։ Բազմաթիվ քաղաքներում, այդ թվում՝ մայրաքաղաք Մինսկում որոշ լրատվամիջոցներ հայտնում են՝ տասնյակ հազարավոր մարդիկ դուրս են եկել բողոքի ակցիաների՝ պահանջելով ավելի քան քառորդ դար նախագահած Ալեքսանդր Լուկաշենկոյին հեռանալ։ Իրավապահները ուժ են կիրառել՝ ռետինե փամփուշտներ, լուսաձայնային նռնակներ, ջրցան մեքենաներ, հաղորդվում է մի քանի տասնյակ տուժածների մասին։ Սպասվում է, որ բողոքի ակցիաները կարող են շարունակվել նաև այսօր։
Լուկաշենկոյի հիմնական մրցակից Սվետլանա Տիխանովսկայան կոչով դիմել է ուժայիններին՝ դադարեցնել բռնությունները, իսկ բողոքի ակցիաների մասնակիցներին հորդորել է չտրվել սադրանքների։ Բելառուսում երեկվանից ծայրահեղ վատ է գործում համացանցը։
Կարլովի համալսարանի գիտաշխատող, միջազգայնագետ Ալեքսեյ Կաժարկսին «Առաջին լրատվական»-ի հետ զրույցում ասաց, որ Բելառուսոի այս ընտրությունները կարելի է պատմական համարել. «Նախկինում երբեք իշխանությունը չի բախվել հանրության այսպիսի մերժման։ Պաշտոնական տվյալներին, որոնք անփոփոխ իշխանությանը վերագրել են 70-80 տոկոս, նախկինում էլ շատերը չէին վստահում, բայց մենք երբեք բելառուս ազգի մոտ չենք տեսել այսպիսի պատրաստակամություն՝ պաշտպանելու սեփական ընտրությունը։ Կա մի կարևոր հանգամանք՝ այս ամենը վերաբերում է թե՛ Բելառուսի մայրաքաղաքին և թե՛ փոքր քաղաքներին՝ ի տարբերություն նախկին ընտրությունների, երբ ընդվզող զանգվածը կենտրոնացած էր Մինսկում։ Այն տեսակետը, որ իշխանությունն իրեն սպառել է և չունի լայն զանգվածների աջակցությունը, տառացիորեն սփռված է հասարակության շրջանակներում»։
Միաժամանակ մեր զրուցակիցն ընդգծեց՝ այժմ հստակ չէ, թե որքանով կոորդինացված և կազմակերպված կարող է լինել դիմադրությունը, և թե ինչ դերակատարում կունենա նախագահի թեկնածու Սվետլանա Տիխանովսկայան. «Միասնական ընդդիմության շտաբից առավոտյան հակասական հայտարարություններ էին հնչում։ Բելառուսում համացանցը գրեթե անջատված է։ Հասկանալի է, որ իշխանությունները մինչև վերջ կանգնած են մնալու՝ նահանջելու տեղ չունեն։ Անցյալ գիշեր իրենք արդեն ցուցադրեցին իրենց պատրաստակամությունը գործածելու բոլոր հնարավոր միջոցները՝ ցավոք սրտի, կան վիրավորներ»։
Ալեքսանդր Լուկաշենկոյին այսօր առավոտյան շտապեց շնորհավորել ՌԴ նախագահ Վլադիմիր Պուտինը։ Շնորհավորական ուղերձում մասնավորապես նշվում է. «Ակնկալում եմ, որ Ձեր պետական գործունեությունը հետագայում ևս կնպաստի բոլոր ոլորտներում ռուս-բելառուսական փոխշահավետ հարաբերությունների զարգացմանը, Միութենական պետության շրջանակում համագործակցության խորացմանը, Եվրասիական տնտեսական միության և ԱՊՀ ինտեգրացիոն պրոցեսների մեծացմանը, ինչպես նաև ՀԱՊԿ-ում ռազմաքաղաքական կապերի խորացմանը: Դա, անկասկած, բխում է Ռուսաստանի և Բելառուսի եղբայրական ժողովուրդների շահերից»։
Ալեքսեյ Կաժարսկիից հետաքրքրվեցինք՝ ի՞նչ է նշանակում այս շնորհավորանքը՝ արդյոք հետագայում ցույցերը անօրինական կերպով ցրելուն ուղղված աջակցությո՞ւն Լուկաշենկոյին: «Մեծ հաշվով՝ այո։ Եթե Պուտինը լիներ դեմոկրատ, եվրոպական առաջնորդ, պետք է դատապարտեր բռնությունը, բայց նա ինքն էլ արդեն դիկտատոր է, տառապում է «պարանոյայով», վախենում է, այսպես կոչված, «գունավոր հեղափոխություններից»: Դիկտատորներն ահա այսպիսի սոլիդարություն ունեն՝ իրենց ժողովուրդների դեմ։ Ուստի սա լուռ, բայց այնուամենայնիվ աջակցություն է։ Գուցե Կրեմլը փորձի հեռու մնալ Բելառուսի իշխանությունների ավելի օդիոզ քայլերից՝ առավել ևս հաշվի առնելով այն փաստը, որ Մոսկվայի ու Մինսկի հարաբերությունները վերջին շրջանում ավելի վատ չէին կարող լինել։ Բայց և չի էլ քննադատի այդ քայլերը»,- եզրափակեց մեր զրուցակիցը։