Պակիստանում վերջին երեք օրն առնվազն 64 մարդ է դարձել մուսոնային անձրևների և հեղեղումների զոհ: Օգոստոսի 10-ին այդ մասին հաղորդել է «Սինհուա» գործակալությունը: Պակիստանի Տարերային աղետների հետևանքների դեմ պայքարի ազգային վարչության տվյալներով՝ ամենից շատ թվով զոհվածները Խայբեր Փախթունխվայի հյուսիս – արևմտյան նահանգում են: Տարածաշրջանում խախտված է կապը հեղեղված շրջանների հետ, գետերի վարարումը ոչնչացրել է հարյուրավոր բնակելի տներ, քանդել կամուրջներ և Էլեկտրահաղորդման բարձրավոլտ գծերի հենարաններ:
Սինդի հարավային նահանգում ջրանցքներից մեկի ամբարտակի ճեղքումը հանգեցրել է մարդկային զոհերի և մի քանի գյուղերի ջրածածկման: Դրանց բնակիչների տարահանմանը ներգրավել են բանակային ստորաբաժանումներ և ուղղաթիռներ: Աղետի գոտում բացել են շարժական հոսպիտալ, որտեղ օգնություն է ցույց տրվում տուժածներին: Անձրևները կազմալուծել են բնականոն կյանքը Պակիստանի խոշորագույն քաղաքներ Կարաչիում և Լահորում: Մեգապոլիսների փողոցները ծածկված են ջրով, հորդացումը լրջորեն դժվարացրել է տրանսպորտի և քաղաքային ծառայությունների աշխատանքը, հաղորդել է ՏԱՍՍ-ը:
