Լիբանանի շրջակա միջավայրի նախարար Դամիանոս Քաթարը հրաժարական է տվել, հաղորդում է լիբանանյան Al-Jadeed հեռուստաալիքը:
Ըստ հեռուստաալիքի, երկրի վարչապետ Հասան Դիաբը փորձել է համոզել Քաթարին չլքել պաշտոնը:
Ավելի վաղ հրաժարական էր տվել Լիբանանի տեղեկատվության նախարար Մանալ Աբդեսամադը: Նա իր որոշումը կապել էր օգոստոսի 4-ին Բեյրութի նավահանգստում տեղի ունեցած պայթյունի հետ:
Բեյրութում օգոստոսի 8-ին հազարավոր մարդիկ են մասնակցել հակակառավարական ցույցին՝ պահանջելով կառավարության հրաժարականը և բարեփոխումներ: Հանրահավաքը վերածվել է անկարգությունների:
Ցուցարարները գրավել են չորս նախարարությունների և բանկերի ասոցիացիայի շենքերը: Բախումների արդյունքում տուժել է ավելի քան 700 մարդ:
Օգոստոսի 4-ին Բեյրութ քաղաքի նավահանգստում ուժեղ պայթյուն է տեղի ունեցել: Լիբանանի վարչապետ Հասան Դիաբը խոսքով, պայթյունի պատճառ է դարձել 2750 տոննա ամոնիումի նիտրատի ոչ պատշաճ պահեստավորումը:
Մոտակայքի, ինչպես նաև պայթյունի վայրից մի քանի կիլոմետր շառավղով գտնվող շենքերի ապակիները փշրվել են, քանդվել է շինությունների մի մասը:
Ողբերգության արդյունքում զոհվել է ավելի քան 150 մարդ, ավելի քան 5 հազար մարդ վիրավորվել է, իսկ ավելի քան 300 հազարը՝ մնացել են անօթևան: