Ֆրանսիայի նախագահ Էմանուել Մակրոնը հայտարարել է, որ Ռուսաստանից և Թուրքիայից օգնություն է ակնկալում պայթյունից տուժած Լիբանանի մայրաքաղաքին, հաղորդում է «Ինտերֆաքս»-ը:
«Կոչն ուղղված է նաև Թուրքիային և Ռուսաստանին: Թուրքիան չկարողացավ միանալ տեսակոնֆերանսին, բայց օգնություն կտրամադրի տուժած երկրին: Վստահ եմ, նույնը կանի նաև Ռուսաստանը»,- ասել է Ֆրանսիայի ղեկավարը Լիբանանի համար միջոցներ հավաքելու նպատակով կազմակերպված միջազգային դոնոր-կոնֆերանսի բացման ժամանակ:
Մակրոնը հավելել է, որ հիմնական նպատակը Լիբանանի բնակչությանը տրամադրված օգնության տեղում արագ և արդյունավետ համակարգումն է:
Օգոստոսի 4-ին Բեյրութ քաղաքի նավահանգստում ուժեղ պայթյուն է տեղի ունեցել: Լիբանանի վարչապետ Հասան Դիաբը խոսքով, պայթյունի պատճառ է դարձել 2750 տոննա ամոնիումի նիտրատի ոչ պատշաճ պահեստավորումը:
Մոտակայքի, ինչպես նաև պայթյունի վայրից մի քանի կիլոմետր շառավղով գտնվող շենքերի ապակիները փշրվել են, քանդվել է շինությունների մի մասը: