Վրաստանի ՆԳՆ փոխնախարար Վլադիմիր Բորցվաձեի հայտարարությամբ՝ Ախալքալաքում իրավիճակը կայուն է, և տեղում մոբիլիզացվել են առավելագույն ոստիկանական ուժեր, որոնք ձեռնարկում են համապատասխան կանխարգելիչ միջոցառումներ՝ հասարակական կարգի և անվտանգության պահպանման համար:
«Երեկ Ախալքալաքում տեղի ունեցած սպանության կապակցությամբ մեկ անձ ձերբակալվել է կանխամտածված սպանության և հրազենի ապօրինի ձեռքբերման և պահելու մեղադրանքով: Ձեռնարկված օպերատիվ-հետախուզական և քննչական գործողությունների արդյունքում պարզվել է, որ 1983 թ. ծնված անձը ՝ փոխադարձ անհամաձայնության հողի վրա հրազենով դիտավորությամբ սպանել է 1993 թ. ծնված անձին: Սպանությունից հետո առճակատումը վերաճել է խմբակային բռնությունների, որի հետևանքով վնասվել է մասնավոր գույքը: Նույն գործով հետաքննություն է իրականացվում խմբակային բռնությունների կազմակերպման և դրան մասնակցելու փաստի առթիվ, ձեռնարկվում են համապատասխան քննչական գործողություններ»,-հայտարարել է Վլադիմիր Բորցվաձեն:
Նրա խոսքով՝ օպերատիվ միջոցառումներ են ձեռնարկվում խմբակային բռնություններին մասնակցած անձանց հայտնաբերելու ուղղությամբ:
«Ինչպես տեսնում եք, իրավիճակը կայուն է: Մոբիլիզացվել են առավելագույն ոստիկանական ուժեր, որպեսզի իրականացնեն համապատասխան կանխարգելիչ միջոցառումներ՝ հասարակական կարգը և անվտանգությունը պահպանելու համար», -Ախալքալաքում լրագրողներին ասել է ՆԳՆ փոխնախարար Բորտսվաձեն:
