Մամուլի ազգային ակումբի նախագահ Նարինե Մկրտչյանը, մեկնաբանելով Թուրքիայի կառավարության՝ երկրում լույս տեսնող հայկական, ինչպես նաև հունական և հրեական պարբերականներին ֆինանսապես աջակցելու՝ կառավարության մտադրությունը, «Առաջին լրատվական»-ի հետ զրույցում ասաց, որ Թուրքիայի կողմից որևէ ներքաղաքական խնդիր քննարկելիս պետք է նկատի ունենալ այն հանգամանքը, որ այն «հակասությունների երկիր է, ու խնդիրը պետք է դիտարկել երկու կողմից:
Ըստ նրա՝ առաջին հերթին պետք է նկատի ունենալ այն, որ Թուրքիան, օժանդակելով փոքրամասնությունների տպագիր մամուլին, նպատակ ունի դյուրին դարձնել դեպի Եվրամիություն իր բարդ ճանապարհը:
«Ինչ վերաբերում է փոքրամասնությունների մամուլին, ապա Թուրքիան ցանկանում է բարելավել քաղաքական հնարավոր հակասությունները, նվազեցնել լարումը»,- ասաց Ն. Մկրտչյանը՝ նշելով, թե պետք չէ «դյուրահավատորեն վերաբերվել Թուրքիայի քաղաքականությանը»:
Նրա կարծիքով՝ սփյուռքի լրատվամիջոցներն անշուշտ կօգտվեն Թուրքիայի կառավարության աջակցությունից, քանի որ սփյուռքում ֆինանսական խնդիրը լրջագույն խնդիր է։ Բացի զուտ իր գործառույթը կատարելուց՝ տպագիր մամուլը սփյուքում այս կամ այն չափով նպաստում է հայկական ինքնության պահպանմանը:
«Անշուշտ, թուրքահայ մամուլի ազատությունը այդ օժանդակությունից կարող է պակասել»,- իր խոսքը եզրափակեց Ն. Մկրտչյանը:
