Լուրեր
Փաշինյանի գլխավոր թշնամին ոչ Քոչարյանն է, ոչ Սարգսյանը, նրա հիմնական հակառակորդը դառնալու է հրապարակի ժողովուրդը
  • 21:40
  • 2020-08-09
  • Դիտումներ՝ *

Հաճախ բարձրաձայնում են Հայաստանի Չորրորդ Հանրապետության հռչակման անհրաժեշտության մասին 2018թ. հեղափոխությունից հետո: «Առաջին լրատվական»-ի հետ զրույցում հրապարակախոս, լրագրող Տիգրան Պասկևիչյանն անդրադառնալով այս դիտարկմանը, նշեց, որ քմծիծաղով է վերաբերվում այդ մասին խոսակցություններին. «Սա Հայաստանի Հանրապետություն է, չգիտեմ ոնց են հաշվում… Չգիտեմ՝ ում գլխում է միտք ծագել՝ կեղծել են պատմությունը… Չկա գիտակցում, որ Ղարաբաղ կոմիտեն ժողովրդի հետ ու ժողովրդի համար ահռելի աշխատանք արեց…»:

«Հանրակրթական պետական չափորոշիչները բխում են մեր ազգային շահերից, այն ուժեղ պետություն ունենալու գրավականն է, և ոչ մի բան մեզ չի շեղելու այդ ճանապարհից»,- Կառավարության նիստում ասել է ՀՀ վարչապետը:
Անդրադառնալով այս դիտարկմանը՝ Տիգրան Պասկևիչյանն ընդգծեց, որ ուժեղ պետության հիմքը, միանշանակ, կրթությունն է. «Կրթություն ասելով՝ պետք է հասկանալ, թե ինչ նկատի ունենք՝ ուզում ենք ունենալ բաց միտք, լայն աշխարհայացք, տեղեկացված հասարակություն, թե ուզում ենք ապահովել ռազմաճակատի թիկունքը: Չափորոշիչները գրողների մոտ հստակ չի երևում, թե ինչ են ուզում: Բայց նրանց ընդդիմախոսները դրել են հստակ պահանջ, որ պետք է ապահովել ռազմաճակատի թիկունքը… Եթե Հայաստանը լիներ խաղաղության մեջ ապրող երկիր, այդպիսի խնդիր չէր առաջանա: Քննարկումներին հետևելով՝ տեսնում եմ, որ փաստարկները հիմնականում պատերազմող երկիր լինելու հանագամանքով են բացատրվում: Գուցե իսկապես պետք է կարևորել թիկունքի բարոյահոգեբանական գործոնը:
Այս մի շարք ձախողումների պատճառն այն է, որ ժամանակին մենք մեր հաղթանակներն ամրագրելուց հետո չգնացինք խնդրի քաղաքական լուծման»:

«Տպավորություն ունեմ, որ հեղափոխությունը (վստահ չեմ այս տերմինն օգտագործում) մսխվեց. մսխվեց հեղափոխության էներգիան, ինտելեկտուալ ներուժը… Հեղափոխության լիցքերն ու հույզերը պետք է կապիտալիզացվեին ստեղծարար ծրագրերով, ինչը չարվեց,- նշեց Տիգրան Պասկևիչյանը:- Նիկոլ Փաշինյանի գլխավոր թշնամին ո՛չ Ռ. Քոչարյանն է, ո՛չ Ս. Սարգսյանը, ո՛չ ՀՀԿ-ն, ո՛չ էլ «Ադեկվատ»-ն ու նրա նման մանր-մունր խմբերը, Նիկոլ Փաշինյանի հիմնական հակառակորդը դառնալու է հրապարակի այն ժողովուրդը, որը չռեալիզացվեց այս հեղափոխությամբ»:

Մանրամասն՝ տեսանյութում:

  • Դիտումներ՝ *