Հուլիսի 31-ին կայացել է Քաղաքականության հետազոտական կենտրոնի կողմից Գերմանիայի Մարշալի հիմնադրամի Սևծովյան տարածաշրջանային համագործակցության հիմնադրամի օժանդակությամբ, Անվտանգության և գլոբալ խնդիրների փորձագետների ասոցիացիայի (Ռումինիա) և Լատվիայի միջազգային հարաբերությունների ինստիտուտի հետ համատեղ իրականացվող
«Ժողովրդավարական արժեքների ամրապնդում՝ համավարակին վերաբերող ապատեղեկատվությանը հակազդելով» ծրագրի բացումը և «ՔՈՎԻԴ-19-ի վերաբերյալ դավադրության տեսությունները որպես ԵՄ-ում և Արևելյան Գործընկերության երկրներում հիբրիդային սպառնալիքների բաղադրիչ» տեսակոնֆերանսը:
Ծրագրի նպատակը կորոնավիրուսի համաճարակի վերաբերյալ ապատեղեկատվության ու մանիպուլատիվ հրապարակումների, ինչպես նաև Կենտրոնական և Արևելյան Եվրոպայում՝ մասնավորապես Արևելյան Գործընկերության երկրներում իրավիճակն ապակայունացնելու նպատակով կեղծ լուրերն ու քարոզչությունն օգտագործելու փորձերի մշտադիտարկումն ու վերլուծությունն է: Ծրագրի շրջանակում մասնավորապես կկատարվի համաճարակի համատեքստում էլեկտրոնային ու սոցիալական մեդիայի միջոցով մանիպուլացիաների համեմատական վերլուծություն՝ հաշվի առնելով ընդհանուր պատկերն ու առանձին երկրներում կիրառվող մեթոդներն, ինչպես նաև քարոզչությունն իրականացնողների միջև կապերը:
Բացման խոսքում ՔՀԿ-ի փոխնախագահ Արմեն Գրիգորյանը մասնավորապես նշել է, որ դեռևս համավարակի սկզբնական փուլում ի հայտ էին եկել կազմակերպված հիբրիդային գործողության նշաններ, և ինչպես այլ հիբրիդային գործողությունների դեպքում, այս դեպքում ևս փորձ է կատարվում վատթարացնել իրավիճակը, ազդել հասարակական տրամադրությունների վրա՝ հետագայում հնարավորության դեպքում իրավիճակն ապակայունացնելու նպատակով: Խնդրի լրջությունը մի քանի անգամ շեշտվել է ԵՄ-ի բարձրաստիճան պաշտոնյաների կողմից. պետք է սակայն հաշվի առնել, որ պակաս պաշտպանված ԱլԳ երկրներում իրականցվում է նույն քարոզչությունը՝ երբեմն հարմարեցված լինելով տեղական առանձհատկություններին, երբեմն էլ պարզապես բառացիորեն կրկնելով ստահոդ կամ մանիպուլատիվ պնդումները: Մասնավորապես, դեռևս մարտ ամսից որոշ շրջանակներ սկսեցին թե ԵՄ-ում, թե Հայաստանում ու այլ երկրներում մոտալուտ սովի ու սոցիալական կոլապսի մասին շահարկումները: Վերջերս ԵՄ-ի անդամների փոխադարձ համերաշխության բացակայության, Իտալիայում շարունակվող հակահամաճարակային սահմանափակումների ու ԵՄ-ից դուրս գալու («Italexit») անհրաժեշտության մասին մանիպուլատիվ պնդումներն օգտագործել են տառացիորեն նույն բառապաշարը, որն արդեն բավական երկար ժամանակ կիրառվում է Հայաստանում քարոզչություն իրականացնողների կողմից. որ իբր արտակարգ դրությունը երկարաձգվում է պատվաստումները պարտադիր դարձնելու համար:
Կենտրոնական Եվրոպայի երկրներում, Լատվիայում, Ռումինիայում, Մոլդովայում, Ուկրաինայում առկա իրավիճակի ու քարոզչության կիրառվող գործիքակազմի վերաբերյալ քննարկման ընթացքում մասնակիցներն անդրադարձան այլ համեմատելի երևույթների ևս: Մասնավորապես, անդրադարձ կատարվեց նաև Հայաստանում և Վրաստանում ԱՄՆ-ի օժանդակությամբ հիմնադրված կենսաբանական հետազոտություններ իրականացնող լաբորատորիայի մասին, որոշ երկրներում «արտաքին կառավարում» հաստատելու, ու մի շարք այլ կեղծ պնդումներին:
Շուտով հասանելի կլինեն ծրագրի շրջանակում նախատեսված հոդվածաշարի առաջին հրապարակումները, իսկ միջոցառումները կվերսկսվեն սեպտեմբերին:
