Ամուլսարում բողոքի ակցիայի մասնակիցները որոշել են բացել ճանապարհը և դադարեցնել այսօրվա ակցիան: Նշենք, որ մի շարք քաղաքացիներ ակցիայի պատճառով շուրջ երեք ժամ շարունակ մնացել են խցանման մեջ և պարբերաբար դժգոհում էին: Ակցիայի մասնակիցները վաղն առավոտյան կվերադառնան՝ հետևելու, թե ինչպես են ապամոնտաժվում Ամուլ սարի հանքի տարածքում գտնվող վագոն-տնակները:
Ինչպես ավելի վաղ հայտնել ենք՝ Ամուլսարում արդեն երրորդ օրն անընդմեջ բողոքի ակցիաներ են իրականացվում: Օրեր առաջ Ամուլսարի 2-րդ պահակակետում «Լիդիան Արմենիա»-ի պահնորդները տեղաշարժել ու իրենց տարածքից դուրս էին բերել Ամուլսարի պահապանների վագոն-տնակը, ինչն էլ բողոքի պատճառ է դարձել, թեեւ համավարակով պայմանավորված Հայաստանում արգելված է հավաքների անցկացումը, սակայն Ամուլսարի տարածքում դրանց անցկացումը չի արգելվում։