ԱՄՆ Սենատը հետաձգել է Հայաստանում ԱՄՆ նոր դեսպանի թեկնածու Ջո Հեֆֆերնի թեկնածության լսումը, ինչը նշանակում է, որ առնվազն մինչև աշուն ԱՄՆ Հայաստանում իր նոր դեսպանի նանակման հարց չի լուծի:
Այդ զարգացումը բավական հետաքրքրական է, եթե համադրենք Հայաստանի ներկայիս ներքաղաքական զարգացումների և դրանցում աշնանը նախանշվող իրադարձությունների, մասնավորապես արտահերթ նախագահական և խորհրդարանական ընտրությունների մասին քաղաքական որոշման կայացման հեռանկարի հետ: Ակնհայտ է, որ Հայաստանում աշնանը լուծվելու է այդ հարցը.
Կամ կայացվելու է արտահերթի մասին որոշում՝ նախագահի կամ խորհրդարանի, կամ էլ աշնանային զարգացումները կփակեն արտահերթի թեման: Հազիվ թե Հայաստանն այդ հարցում աշնանը լինի անորոշ վիճակում: Եվ այդ առումով ԱՄՆ փաստորեն մինչ այդ գերադասում է Հայաստանում դեսպան չունենալ, չշտապել այդ հարցում:
Իհարկե, ԱՄՆ-ում ներկայումս այդ հարցը թերևս հարյուրերորդական կամ հազարերորդական կարևորության հարց է, նկատի ունենալով դեֆոլտի կարևորագույն խնդիրը, որ ներկայումս կախված է ԱՄՆ քաղաքական էլիտայի և ընդհանրապես պետության գլխին: Սակայն ԱՄՆ-ի պես պետություններում անգամ հարյուրերորդական հարցերը չեն անտեսվում և մատնվում ինքնահոսի: Այդ պետությունների հզորությունն ու ուժը հենց այն է, որ նրանք կարողանում են ռեսուրսներ գտնել բոլոր ուղղություններով արդյունավետ և օպտիմալ աշխատելու համար, կամ առնվազն փորձում են դա անել:
Իսկ հայաստանյան ուղղությունն այդուհանդերձ ԱՄՆ-ի համար կարծես թե կարևոր ուղղություն է, այլապես հազիվ թե ԱՄՆ-ի նախկին դեսպան Մարի Յովանովիչը ակտիվ ջանք գործադրեր Հայաստանում ծայրահեղ հակադրության ընդդիմադիր ու իշխանական քաղաքական միավորների միջև շփման եզրեր գտնելու ուղղությամբ: Իսկ որ այդ ջանքը գործադրվել է, օրեր առաջ հայտարարեց հենց նոր դեսպանի թեկնածու Հեֆֆերնը Սենատի լսումների ընթացքում:
Դեսպանի նշանակումը դիվանագիտական ժեստ է, որով վերաբերմունք է ցուցաբերվում տվյալ երկրի և իշխանության հանդեպ: Առանց դեսպանի էլ ԱՄՆ-ի գործերը Հայաստանում կատարվելու են, բայց դեսպանի նշանակումն այդ երկրի և հատկապես տվյալ իշխանության հետ հարաբերության գնահատական է:
Փաստորեն Միացյալ Նահանգները հետաձգում է Հայաստանի իշխանության գնահատականը մինչև աշուն, և այդ հանգամանքը երևի թե վկայում է, որ այդ գնահատականը մեծապես պայմանավորվում է արտահերթ ընտրության մասով իշխանության կայացնելիք որոշումից:
