Լիբանանի մայրաքաղաք Բեյրութի նավահանգստային գոտում տեղի ունեցած սարսափելի պայթյունը ցնցել է աշխարհը: Այս պահի դրությամբ զոհերի թիվը գերազանցում է 100-ը, վիրավորվել է ավելի քան 4000 մարդ: Վերջին տվյալներով՝ պայթյունի արդյունքում զոհված հայերի թիվը հասել է 11-ի: Ամբողջությամբ ավերվել են Լիբանանի մայրաքաղաքի մի քանի թաղամասեր: Թեմայի շուրջ «Առաջին լրատվական»-ը զրուցել է «Օրբելի» կենտրոնի փորձագետ Կարեն Վերանյանի հետ:
«Բեյրույթի պայթյունի թեմային անդրադառնալիս մի շարք հարցեր են ծագում` ինչու են նման քանակությամբ, մեծ ծավալի պայթյուցիկ նյութերը տարիներ շարունակ պահվել ռազմավարական նշանակություն ունեցող տարածքում՝ նավահանգստում, որն ավելի մեծ կարևորություն էր ստացել այն ժամանակ, երբ երկիրն արդեն հայտնվել էր ֆինանսատնտեսական լուրջ ճգնաժամի մեջ: Այսինքն` դա հիմնական ուղիներից մեկն է եղել, ամենակարևոր տրանսպորտային հաղորդակցական ուղիներից մեկը, որով սնվել է Լիբանանը: Այստեղ իսկապես շատ լուրջ հարցեր են առաջանում… իհարկե, եթե հիմնվենք Լիբանանի պաշտոնական հաղորդագրության վրա, ստացվում է, որ տեղի ունեցած ողբերգությունը թերի կառավարման, անփութության հետևանք էր»,- ասաց Վերանյանը:
Մեր զրուցակիցը կարծում է, որ Բեյրութում տեղի ունեցած պայթյունը աղետալի երևույթ է ոչ միայն Լիբանանի, այլև ամբողջ տարածաշրջանի համար: Նրա խոսքով՝ տեղի ունեցածն ամեն դեպքում տարածաշրջանում և Լիբանանում վերջին շրջանում արտաքին ուժերի շահերի բախման թեժացման միտումների հետևանքն է:
Մանրամասները՝ տեսանյութում:
