Բեյրութի նավահանգստում պայթած ամոնիումի նիտրատը, ամենայն հավանականությամբ, արտադրվել է Վրաստանում՝ Ռուսթավիի «Ազոտ» գործարանում: Այս մասին «Էխո Կավկազին» ասել է «Ռուսթավիի ազոտ» ԲԸ-ի տնօրենի տեղակալ Լևան Բուրդիլաձեն:
Նա բացատրել է, որ իր ընկերությունը շահագործում է գործարանը 2017 թվականից, իսկ այդ բեռը 2013 թվականի է:
«Այն ժամանակ գործարանը ղեկավարում էր մեկ այլ իրավաբանական անձ` «Ռուսթավիի գործարան» ՍՊԸ-ն, ուստի ես չեմ կարող ճշգրիտ եւ հավաստի տեղեկատվություն տրամադրել», – նշել է Բուրդիլաձեն:
Միևնույն ժամանակ, ընկերության ներկայացուցիչը «Էխո Կավկազին» ասել է, որ Ռուսթավիում արտադրված արտադրանքի պահպանման ժամկետը 6 ամիս է:
«Համաձայն սոցիալական ցանցերում և համացանցում շրջանառվող տեղեկությունների՝ ժամկետանց ամոնիումի նիտրատը պահել են երկար տարիներ՝ կոպտորեն խախտելով անվտանգության կանոնները: Հատկապես անընդունելի է այս ապրանքը խոնավ պայմաններում, նավահանգստի տարածքում պահելը: Ըստ չհաստատված տեղեկությունների՝ մոտակայքում պայթուցիկ նյութերի արտադրություն է կազմակերպվել: Սա նույնն է, ինչպես նավթով կամ գազով ցիստեռնի մոտ կրակ վառես»,-ասել է Բուրդիլաձեն:
Ըստ նրա, այժմ Ռուսթավիի «Ազոտ»-ն ապրանքներ է մատակարարում տասնյակ երկրներ, ներառյալ՝ Մարոկկո, Իտալիա, Ֆրանսիա, Մեծ Բրիտանիա, Ուկրաինա, Հարավային Ամերիկայի երկրներ:
Լիբանանի իշխանությունները հայտնել են, որ Բեյրութի նավահանգստի տարածքում տեղի ունեցած պայթյունների պատճառ է դարձել մաքսային ծառայությունների կողմից վեց տարի առաջ առգրավված եւ պահեստում պահվող 2.750 տոննա ամոնիումի նիտրատն է եղել:
