Ես կարծում եմ՝ այդ թեկնածուին մեր գնահատականը տվել ենք և դժվար թե այս ընթացքում թեկնածուի վերաբերյալ մեր դիրքորոշումը փոխված լինի: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Տիգրան Ուլիխանյանը՝ անդրադառնալով նրան, որ ՀՀ նախագահը ՍԴ դատավորի թեկնածու է առաջադրել Արթուր Վաղարշյանին, որին մեկ անգամ արդեն խորհրդարանը մերժել էր:
«Համենայնդեպս ես հիմքեր չեմ տեսնում առարկայական փոփոխությունների համար: Այս պահին այլ բան չեմ ուզում ասել, սակայն ինձ համար էլ տրամաբանությունը հասկանալի չէ երկրորդ անգամ նույն մարդուն առաջադրելու»,-ասաց նա:
Տեսակետին, որ եթե կառավարությունը թեկնածու է առաջադրում Աղվան Հովսեփյանի սպասարկուի զավակին, նախագահն ինչո՞վ կաշկանդված, որ նույն թեկնածուին չառաջադրեր, Տիգրան Ուլիխանյանն արձագանքեց. «Ես իմ խոսքում որևէ կերպ չքննադատեցի նախագահին, ես շեշտեցի, որ չեմ հասկանում տրամաբանությունը: Ինչ վերաբերում է կառավարության կողմից ներկայացրած թեկնածուի հետ համեմատականին, ապա դա տեղին չէ, որովհետև այս խորհրդարանը ՀՀ նախագահի կողմից ներկայացրած թեկնածուի վերաբերյալ արդեն գնահատական տվել է ի տարբերություն կառավարության կողմից ներկայացրած թեկնածուի, որին մենք գնահատական տալու ենք»: