Լիբանանի կառավարությունը կարգադրել է տնային կալանքի տակ վերցնել Բեյրութի նավահանգստի ամբողջ վարչակազմը, որտեղ նախօրեին հզոր պայթյուն է տեղի ունեցել, հաղորդում է LBC International հեռուստաալիքը:
Հաղորդվում է, որ նավահանգստի ղեկավար կազմը կմնա կալանքի տակ, քանի դեռ չեն պարզվել տեղի ունեցածի համար պատասխանատու կոնկրետ անձինք:
Այս որոշումը կայացվել է կառավարության արտակարգ նիստում:
Օգոստոսի 4-ին Բեյրութ քաղաքի նավահանգստում ուժեղ պայթյուն է տեղի ունեցել: Լիբանանի վարչապետ Հասան Դիաբը հայտարարել է, որ պայթյունի պատճառ է դարձել 2750 տոննա ամոնիումի նիտրատի ոչ պատշաճ պահեստավորումը: Մոտակայքի, ինչպես նաև պայթյունի վայրից մի քանի կիլոմետր շառավղով գտնվող շենքերի ապակիները կոտրվել են, շինությունների մի մասը քանդվել է:
Պայթյունի զոհ են դարձել ավելի քան 100 մարդ, վիրավորվել են քաղաքի ավելի քան 4 հազար բնակիչներ: