Օգոստոսի 4-ին ուժգին պայթյուն է որոտացել Բեյրութի նավահանգստում, զոհերի թիվը գերազանցում է հարյուրը, կան հազարավոր վիրավորներ, այդ թվում՝ հայ համայնքի շրջանում: Թեմայի շուրջ «Առաջին լրատվական»-ը զրուցել է արաբագետ Արմեն Պետրոսյանի հետ:
«Ցավոք սրտի, լիբանանահայ համայնքը, որ վերջին շրջանում առանց այդ էլ բավականաչափ ծանր վիճակում էր հայտնվել, հերթական անգամ չի կարողանում խուսափել այն աղետից, որը պատել է ամբողջ մայրաքաղաքը: Ունենք ինչպես զոհեր, վիրավորներ, այնպես էլ նյութական վնասներ»,- ասաց Պետրոսյանը:
Մեր զրուցակիցը, բարձր գնահատելով Հայաստանի Հանրապետության ձեռնարկած քայլերը, որոնք ուղղված են Լիբանանին աջակցելուն, շեշտեց, որ մեր երկիրը պետք է ունենա պատրաստի գործողությունների ծրագիր՝ հայկական տարբեր համայնքների հետ կապված, անկախ նրանից, թե աղետի պատճառը որն է: «Առաջիկա օրերին արդեն տեսնելու ենք այս պայթյունի ուղղակի սոցիալական հետևանքները: Արդեն իսկ հայտնի է, որ պայթյունի հետևանքով Լիբանանը կորցրել է հացահատիկի պահուստի և անհրաժեշտ առաջնային պարենի այլ պաշարներ: Իհարկե, զորակցությունից, ցավակցական ուղերձներից բացի՝ եթե ՀՀ-ն ունի հնարավորություն, պետք է փորձի ավելի առարկայական աջակցություն ցուցաբերել»:
Պետրոսյանը նաև կարծում է, որ գործընթացները ստեղծված իրավիճակում Լիբանանում քաղաքական երանգ են ստանալու: «Հարցը քաղաքականացվելու է Լիբանանին ցուցաբերվելիք արտաքին աջակցության համատեքստում: Կրկին շահարկվելու է «Հըզբոլլահի» դերակատարումը երկրում, անգամ նման աղետալի իրավիճակում քաղաքական շահարկումներ են լինելու. Լիբանանի իշխանություններին կանգնեցնելու են երկընտրանքի առաջ՝ կա՛մ հրաժարվել Իրանի աջակցությունից, կա՛մ արտաքին աջակցությունից, առանց որի երկրի իշխանությունները չեն կարողանալու հաղթահարել այս ճգնաժամը»:
Առավել մանրամասն՝ տեսանյութում: