Երևանի գլխավոր ճարտարապետ Արթուր Մեսչյանի հրաժարականը Ֆիրդուսի թաղամասի կառուցապատման աշխատանքների հետագա ընթացքի վրա դժվար թե ազդեցություն ունենա։ Այդ մասին «Առաջին լրատվական»-ի հետ զրույցում ասաց Երևանի ժառանգության պաշտպանության կոմիտեի անդամ, Ֆիրդուսի թաղամասի մշակութային ժառանգության պահպանության համար պայքարող նախաձեռնող խմբի անդամ Սևադա Պետրոսյանը։
«Ֆիրդուսիի հետ կապված ասեմ հետևյալը․ ինչպես մենք ասել ենք մեր բոլոր հրապարակային հայտարարություններում, խոսակցություններում, քաղաքապետարանն իր ձեռքերը լվացել է, ասում է՝ դա կառավարության ծրագիրն է, իրենք կապ չունեն, միայն ժամանակին տվել են նախագծման թույլտվություն ու այդքանով իրենց գործն արել են։ Ո՛չ պարոն Մեսչյանը, ո՛չ քաղաքապետը որևէ կերպ չեն ուզել խառնվել կամ այդ գործում պատասխանատվություն վերցնել։ Դա կառավարության գործն է։
Դժբախտաբար, կառավարությունը խառնվում է քաղաքային իշխանության գործերին, որոշում, թե Երևանում ինչ թաղամաս կարելի է կառուցել կամ ոչ, ինչ տեսքով և այլն։ Այս դեպքում ո՛չ պարոն Մեսչյանը, ո՛չ քաղաքապետարանը որևէ ձևով ներգրավված չէին այս գործընթացում։ Այնպես որ, Ֆիրդուսիի ճակատագրում սա որևէ բան չի փոխելու»,- մեկնաբանեց Սևադա Պետրոսյանը։
Նրա խոսքերով՝ միակ փոփոխությունը կարող է այն լինել, որ Մեսչյանից հետո եկող ճարտարապետը քաղաքի համար նոր ռազմավարություն մշակի, ըստ այդմ՝ գոտևորման ու քաղաքի տարածական կառավարման նախագծեր, որն ինչ-որ ձևով հնարավոր է Ֆիրդուսի թաղամասի կառուցապատման գործընթացի վրա ևս ազդի։ «Չնայած, ես շատ խիստ կասկածում եմ, որ նման ինչ-որ բան կլինի։ Այսինքն՝ համակարգային փոփոխություն լինի։ Եթե պարոն Մեսչյանը չաշխատի, իր փոխարեն ուրիշ մեկը կգա, և ուղղակի դեմքերը կփոխվեն։ Այդքան բան»,- նշեց Սևադա Պետրոսյանը։
Հարցին՝ հնարավոր համարո՞ւմ են, որ Մեսչյանի հրաժարականի պատճառների թվում կարող է Ֆիրդուսի թաղամասի կառուցապատման աղմկոտ գործընթացը լինել, մեր զրուցակիցը պատասխանեց․ «Ես չեմ կարող դրա վերաբերյալ որևէ կարծիք հայտնել։ Եթե նույնիսկ նման բան կա, դրանք ներքին քննարկման հարցեր են, բայց ես ոչ մի ձևով չեմ կարող մեկնաբանել դա։ Ես ինչ-որ տեղ կհասկանայի ու տրամաբանական կլիներ, եթե քաղաքի գլխավոր մասնագետը մի քիչ նեղացած լիներ, որ իր լիազորությունների շրջանակում եղած գործն անում է մեկ ուրիշ մարմին, որն օրենքով լիազորված չէ։ Բայց ես ոչ մի տեղեկություն չունեմ և մեկնաբանություն չեմ կարող տալ»։