ԿԺԴՀ-ն շարունակում է զարգացնել իր միջուկային ծրագիրը և, ըստ մի շարք երկրների, հնարավոր է՝ մշակել է «փոքրիկ միջուկային սարքեր, որոնք հարմար են իր բալիստիկ հրթիռների մարտագլխիկների համար»:
Այս մասին հայտնում են Reuters -ը և DPA-ը՝ վկայակոչելով ՄԱԿ-ի Անվտանգության խորհրդի ներկայացրած գաղտնի զեկույցը: Վերլուծությունը պատրաստվել է միջազգային պատժամիջոցների կիրառման վերահսկողության համար պատասխանատու անկախ փորձագետների կողմից:
Փորձագետներն անդրադարձել են անանուն պետությունների ներկայացուցիչներից ստացված տեղեկություններին:
Այս երկրները կարծում են, որ Հյուսիսային Կորեայի կողմից իրականացված վեց վերջին միջուկային փորձարկումները կարող էին նպաստել փոքրիկ սարքերի մշակմանը: Զեկույցում նշվում է նաև, որ Փհենյանը շարունակում է աշխատել բարձր հարստացված ուրանի արտադրության և փորձարարական թեթև ջրային ռեակտորի կառուցման ուղղությամբ:
