Թուրք-ադրբեջանական համատեղ լայնամասշտաբ զորավարժությունները, որ մեկնարկեցին հուլիսի 29-ին և կշարունակվեն մինչև օգոստոսի 10-ը Ադրբեջանի Հանրապետության մի շարք շրջաններում, այդ թվում՝ Նախիջևանի տարածքում, շարունակում են մնալ ուշադրության կենտրոնում: Օգոստոսի 2-ին հաղորդագրություն տարածվեց և այնուհետև հերքվեց, որ իբրև թե թուրքական կործանիչները մոտեցել են Հայաստանի սահմանին, որն ադրբեջանական լրատվամիջոցներում ներկայացվել է «Սենսացիոն լուր» վերտառության տակ:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Տաթևիկ Հայրապետյանը, թուրքագետ Հայկ Գաբրիելյանը և քաղաքական գիտության հայկական ասոցիացիայի գործադիր տնօրեն, քաղաքագետ Բենիամին Պողոսյանը:
Տաթևիկ Հայրապետյանի խոսքով՝ թուրք-ադրբեջանական համատեղ զորավարժություններն ուռճացնելու միտում է նկատվում: «Պատահական չէ, որ դրանք տեղի ունեցան տավուշյան լարվածության ֆոնին և կարևոր քարոզչական նպատակներ են հետապնդում… Տարբեր գործոններ ցույց են տալիս, որ Ալիևն իր ժողովրդի աչքին թոզ փչելու համար տարբեր գործիքներ է կիրառում: Թուրքիան այսպես թե այնպես սպառնալիք է Հայաստանի համար, բայց այն, որ Թուրքիան ուղղակի միջամտություն կունենա ռազմական գործողությունների վրա և զորքեր կբերի Հայաստան, դա ուռճացված մտավախություն է: Թուրքիան միշտ էլ ընդգծված աջակցություն է ցուցաբերել Ադրբեջանին, բայց խելքը չի թռցնի և ուղղակի միջամտություն չի ցուցաբերի՝ հասկանալով, թե դա տարածաշրջանում ինչերի կբերի»:
Բենիամին Պողոսյանի դիտարկմամբ՝ նման զորավարժություններ բազմիցս եղել են և նախորդ զորավարժությունների համեմատ դժվար թե էական տարբերություններ լինեն. «Ինչ վերաբերում է անհանգստությանը, քանի որ զորավարժությունները սկսեցին տավուշյան էսկալացիայից 17 օր անց, հասկանալի է, որ պետք է մտահոգություն առաջանար, սակայն չեմ կարծում, որ գործ ունենք արտառոց երևույթի հետ»:
Հայկ Գաբրիելյանը, անդրադառնալով ինքնաթիռային միջադեպին, նշեց, որ անտեղի խուճապ տարածելու միտում կա. « Բայց չեմ կարծում, թե Թուրքիան պատրաստ է հատելու մեր օդային տիրույթը, քանի որ, թերևս, բավականին լավ է սերտել 2012թ. դեպքը, երբ որ թուրքական կործանիչը մուտք գործեց Սիրիայի օդային տիրույթ և խփվեց, Թուրքիայնին ոչինչ չէր մնում, քան հոխորտալը և ՆԱՏՕ-ի օգնությանը դիմելը»:
Հայկ Գաբրիելյանի դիտարկմամբ՝ տավուշյան միջադեպը շատ ուժեղ հարված է հասցրել թե՛ Էրդողանի, թե՛ Ալիևի իմիջին, և այս զորավարժությունները նրանց դեմքը փրկելու համար են:
Ռուսաստանն էլ միաժամանակ զորավարժություններ է անցկացնում Հարավային Կովկասում: Անդրադառնալով այս դիտարկմանը՝ Տաթևիկ Հայրապետյանը նշեց. «Գործ ունենք տարածաշրջանում աշխարհաքաղաքական շահերի հետ, ռուս-թուրքական հակամարտությունն ազդում է նաև մեր երկրի վրա, և Թուրքիան Հարավային Կովկասը պահում է որպես խաղաքարտ, նա դերակատարում ունենալու, խաղացող լինելու ակնհայտ հավակնություններ է ներկայացնում, բայց միևնույն ժամանակ Թուրքիան գնալով ավելի է վաստակում տարածաշրջանում ագրեսորի իմիջը, և Ռուսաստանը էլ ավելի զգոն է դառնում և ցույց է տալիս, որ տարածաշրջանում որևէ ոտնձգություն թույլ չի տալու»:
Բենիամին Պողոսյանի խոսքով՝ քանի դեռ Հարավային Կովկասում թիվ մեկ խաղացողը Ռուսաստանն է, և քաի դեռ Հայաստանը գտնվում է նրա ազդեցության գոտում, հասկանալի է, որ Թուրքիան ուղղակի Հայաստանի վրա չի հարձակվի. «…Իսկ Ղարաբաղի հարցով հնարավոր է տեղի ունենա Թուրքիա-Ռուսաստան համագործակցություն…»:
Մանրամասն՝ տեսանյութում: