Ես կարծում եմ, որ երաժիշտ կատարողների հարցն առաջին հերթին պետք է քննարկվեր կառավարության ներկայացուցիչների հետ: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արփինե Դավոյանը՝ անդրադառնալով նրան, որ ԲՀԿ առաջնորդ Գագիկ Ծառուկյանը հանդիպել է երաժիշտ կատարողների հետ ու խոստացել, որ նրանց խնդիրներն իր ուշադրության կենտրոնում կլինեն:
«Այսինքն պետք է հարցը քննարկվեր այն մարդկանց հետ, որոնք պատասխանատու են և արտակարգ դրության, և սահմանափակումների հետ կապված: Իսկ Գագիկ Ծառուկյանի հետ հանդիպումն ինձ համար, մեղմ ասած, զարմանալի է, որովհետև Գագիկ Ծառուկյանը ընդամենը փորձում է քաղաքական դիվիդենտներ քաղել այս իրավիճակից, փորձել վերականգնել իր կուսակցության անունը՝ փորձելով ցույց տալ, որ շարունակում է մնալ քաղաքական գործընթացների մեջ կամ կշիռ ձեռք բերել: Չեմ կարծում, որ այս հանդիպումը կարող է որևէ լուրջ նշանակություն ունենալ, որովհետև ինքն այն մարդը չէ, որ կարող է ինչ-որ հարցեր քննարկել ու լուծել: Չեմ զարմանա, որ հաջորդը Գագիկ Ծառուկյանը հանդիպի այն մարդկանց հետ, որոնք ավելի շատ ստատուս կգրեն ֆեյսբուքում»,-ասաց նա։
