Արդեն վեց տարի օգոստոսի 3-ին ողջ աշխարհի եզդիները և քաղաքակիրթ մարդկությունը հարգանքի տուրք են մատուցում 2014 թվականի օգոստոսի 3-ին Իրաքում «Իսլամական Պետություն» ահաբեկչական խմբավորման գրոհայինների կողմից գազանաբար սպանված հազարավոր եզդիների հիշատակին:
Հայ ժողովուրդը նույնպես ու հատկապես որպես ցեղասպանություն վերապրած ժողովուրդ այսօր Հայաստանում ապրող իր եզդի եղբայրների կողքին է և հարգանքի տուրք է մատուցում 6 տարի առաջ իրականացված անմարդային ոճրագործության զոհերի հիշատակին։ 2014 թվականին տեղի ունեցած Սինջարի ցեղասպանությունը Հայաստանը դատապարտել է նաև պետական մակադրակով՝ 2018 թվականին Հայաստանի խորհրդարանը միաձայն ընդունել է «Ահաբեկչական խմբավորումների կողմից իրենց վերահսկողության ներքո գտնվող Իրաքի Հանրապետության տարածքներում եզդի ժողովրդի նկատմամբ 2014թ. իրականացված ցեղասպանության դատապարտման մասին» ՀՀ ԱԺ հայտարարության նախագիծը, ինչը բարեկամ եզդի ժողովրդին ապրումակից լինելու մեր հավաքական ցանկության վկայություններից մեկն է միայն։
Հայոց ցեղասպանության միջազգային ճանաչումն ու դատապարտումը, որը Հայաստանի Հանրապետության արտաքին քաղաքական օրակագրի կարևորագույն բաղադրիչն է, նպատակ ունի ոչ միայն վերականգնելու պատմական արդարությունը, այլ նաև կանխելու մեր օրերում տարբեր ժողովուրդների նկատմամբ ցեղասպանության իրագործումը, ինչպիսն էր Սինջարի ցաղասպանությունը 2014 թվականին։
Մենք այսօր հիշում ու ոգեկոչում ենք այդ հակամարդկային հանցագործության զոհերի հիշատակը՝ նրանց առջև պարտք ունենալով թույլ չտալ նման գազանությունների կրկնությունը ապագայում։
https://www.facebook.com/babajanyana/photos/a.2309525339078180/3513007755396593/?type=3&theater