Առողջապահության համաշխարհային կազմակերպության (ԱՀԿ) փորձագետների խումբն ավարտել է աշխատանքը Չինաստանում: Այդ գործունեության արդյունքները հիմք կծառայեն հետագա հետազոտությունների համար՝ նպատակամիտված կորոնավիրուսի ծագման պարզաբամանը, որը հարուցում է COVID-19 հիվանդությունը, օգոստոսի 3-ին Ժնևում կայացած ճեպազրույցում հայտարարել է ԱՀԿ-ի գլխավոր տնօրեն Թեդրոս Ադանոմ Գեբրեյեսուսը՝ հաղորդել է ՏԱՍՍ-ը:
Գլխավոր տնօրենի խոսքով՝ այդ առաքելության արդյունքն է դարձել ԱՀԿ-ի և Չինաստանի փորձագետների կողմից «ԱՀԿ-ի ղեկավարած միջազգային խմբի հետազոտությունների և գործունեության ծրագրի մասին» փաստաթուղթը: Այդ խմբի մեջ կմտնեն փորձագետներ Չինաստանից և այլ երկրներից: ԱՀԿ-ի ղեկավարը հայտնել է, որ համաճարակաբանական հետազոտությունները կսկսվեն Ուհան քաղաքում: Դրանց նպատակը կլինի «վարակի պոտենցիալ աղբյուրի պարզումը COVID-19-ի վաղ դեպքերի ժամանակ:
«Վկայությունները և վարկածները, որոնք կառաջանան այդ աշխատանքի ընթացքում, հիմք կդնեն հետագա, երկարաժամկետ հետազոտությունների համար»,- նշել է Թեդրոս Ադանոմ Գեբրեյսուսը: Գլխավոր տնօրենը հիշեցրել է, որ այժմ աշխարհում մշակվում են կորոնավիրուսի դեմ մի շարք պատվաստանյութեր: Դրանցից որոշներն անցնում են կլինիկական փորձարկումների երրորդ փուլը: «Մենք բոլորս հուսով ենք, որ կստանանք մի շարք արդյունավետ պատվաստանյութեր, որոնք կօգնեն կանխելու մարդկանց ախտահարումը»,- ասել է նա:- Սակայն այս պահին համադարման չկա, և այն կարող է երբեք չլինել»: