Մարտ ամսին պետք է կայանային ԵՊՀ ռեկտորի ընտրություններ, սակայն դրանք հետաձգվեցին։ Մարտի վերջին լրացավ նաև ԵՊՀ հոգաբարձուների խորհրդի լիազորությունների ժամկետը։ Մայր բուհը մեկ տարուց ավելի է, ինչ ռեկտոր չունի։
Մեկ ամսից մեկնարկելու է նոր ուսումնական տարին, մտավախություն կա՞, որ ԵՊՀ-ն այդպես էլ ռեկտոր չի ունենա․ «Առաջին լրատվական»-ի հարցին ԵՊՀ դոցենտ Մենուա Սողոմոնյանը պատասխանեց․ «Այո, կա այդ մտավախությունը, ինչպես նաև այն մտավախությունը, թե ինչպես են անցկացվելու դասերը՝ դեմ առ դե՞մ, թե՞ նորից հեռավար։ Որքանո՞վ ենք մենք դրան պատրաստ։ Ճիշտ է, փորձեցինք ամեն ինչ անել, որպեսզի պատրաստ լինենք, բայց դեռևս կան շատ անելիքներ։ Դա այսօր մեր առջև ծառացած բազմաթիվ հարցերից մեկն է։ Ցավոք սրտի, մենք առ այսօր չունենք որոշակիություն այս հարցում՝ կձևավորվի՞ հոգաբարձուների խորհուրդը, թե՞ ոչ, նոր ուսումնական տարում կունենա՞նք նոր ռեկտոր, թե՞ ոչ։ Սա իսկապես մտահոգության տեղիք տվող հարց է։
Վերջերս ԿԳՄՍ նախարարության ներկայացուցիչն ասաց, որ մոտ օրերս կներկայացվի, բայց մենք այդ «մոտ օրերս», «մոտ ժամանակներս» եզրույթը լսել ենք բավականին երկար ժամանակ առաջ, և այդ «մոտը», կարծես թե, չենք կարողանում տեսնել, թե որքանով է մոտ»։
Հայաստանի օրենսդրությամբ, ԵՊՀ կանոնադրությամբ արդյոք չկա՞ն սահմանված հստակ գործառույթներ, որոնց միջոցով պետք է ընտրվի ԵՊՀ հոգաբարձուների խորհուրդը․ «Առաջին լրատվական»-ի հարցին Մենուա Սողոմոնյանը պատասխանեց․ «Այո, հստակ է սահմանված։ Դեռևս 2004 թվականին ընդունված «Բարձրագույն և հետբուհական կրթության մասին» օրենքով է սահմանվում դա։ Իսկ ԵՊՀ կանոնադրությամբ էլ ֆիքսված է, որ հոգաբարձուների խորհրդի լիազորությունների ավարտից հետո ոչ ուշ, քան 30 օրվա ընթացքում անհրաժեշտ է ունենալ նոր հոգաբարձուների խորհուրդ։ Եթե որևիցե նման բան նշված չլիներ, ապա տրամաբանությունն էլ է հուշում՝ ցանկացած կոլեգիալ մարմնի ժամկետի լրանալու դեպքում պետք է նոր կոլեգիալ կառավարման մարմին ձևավորվի»։
Մանրամասները՝ տեսանյութում։